Oliy taʼlim vazirligi Hindiston va Bangladeshdan talabalarni qabul qilish taqiqlangani haqidagi xabarlarni rad etdi

Idorada tarqatilayotgan axborot haqiqatga toʻgʻri kelmasligi, mamlakat esa xorijiy talabalar oqimini kengaytirish va taʼlim xizmatlari eksportini rivojlantirishdan manfaatdor ekani bildirildi.

Joriy oʻquv yilidan boshlab chet ellik abituriyentlar uchun arizalarni topshirish Study in Uzbekistan yagona elektron platformasi orqali yoʻlga qoʻyildi. Xizmat bepul boʻlib, u oʻqish shartlari bilan tanishish hamda vositachilarni jalb qilmasdan toʻgʻridan toʻgʻri taʼlim muassasalariga hujjat topshirish imkonini beradi.

Xorijiy fuqarolarni qabul qilish hajmini har bir oliy taʼlim muassasasi mustaqil ravishda belgilaydi. Kvotalarni shakllantirishda auditoriyalar va laboratoriyalar sigʻimi, professor-oʻqituvchilar tarkibi hamda talabalar turar joylaridagi oʻrinlar mavjudligi inobatga olinadi.