Mirziyoyev kreditlar reklamasida xatarlardan ogohlantirish toʻgʻrisidagi qonunni imzoladi

Qonun 2022-yil 7-iyundagi «Reklama toʻgʻrisida»gi qonunning 43-moddasiga qoʻshimcha kiritmoqda. Yangi normaga koʻra, kredit reklamasi, jumladan mikroqarz, qarz majburiyatlarining bajarilmasligi qarz oluvchi uchun moliyaviy xatarlarga olib kelishi mumkinligi haqida ogohlantirishi lozim. Ushbu ogohlantirish uchun reklamaning asosiy maydoni va vaqtining kamida 10 foizi ajratiladi, yaʼni talab bosma materiallarga ham, audio- va videoroliklarga ham taalluqlidir.

Hujjat matnidan kelib chiqishicha, ogohlantirish haqidagi norma qonun kuchga kirganidan keyin uch oy oʻtgach ishlay boshlaydi, qolgan qoidalar rasmiy eʼlon qilingan kundan eʼtiboran amal qiladi. Tuzatishlar Qonunchilik palatasidan 2026-yil 14-aprelda oʻtgan, 7-avgust kuni esa ularni Senat maʼqullagan.

Qonun, shuningdek, sugʻurta savodxonligini oshirishga doir maʼlumotlarni ijtimoiy axborotga kiritadi. 20-moddada ijtimoiy axborot reklama beruvchilarining doirasi kengaytirildi: jismoniy va yuridik shaxslarga sohalardagi vakolatli organlar qoʻshildi. Qonunning ijro etilishi va uning aholiga tushuntirilishiga Markaziy bank, Istiqbolli loyihalar milliy agentligi, Raqobatni rivojlantirish va isteʼmolchilar huquqlarini himoya qilish qoʻmitasi, shuningdek boshqa manfaatdor tashkilotlar javob beradi.

Kredit reklamasi va banklarning shartnomalariga qoʻyiladigan alohida talablarni Markaziy bank sentabr oxirida tasdiqlagan edi. Ularga muvofiq, xatarlar haqidagi ogohlantirish kredit shartnomasining birinchi sahifasida asosiy matndan oldin joylashtiriladi va sahifa asosiy maydonining kamida 30 foizini egallaydi.