Oʻzbekistonning zaxiralari 2026-yil oktabr oyida 63,63 mlrd dollargacha kamaydi

Zaxiralar ketma-ket ikkinchi oy qisqarmoqda. Sentabr oyida qisqarish 5,55 mlrd dollarni tashkil etgan edi — 72,13 mlrd dollar darajasidan 66,59 mlrd dollargacha. Koʻrsatkich hozirgi darajadan pastroqqa oxirgi marta 2025-yil dekabrida tushgan boʻlib, oʻshanda 61,2 mlrd dollarni tashkil qilgan edi.

Markaziy bank oktabrdagi pasayishning asosiy sababini arzonlashgan oltinda deb biladi. Regulyatorning tushuntirishiga koʻra, troya unsiyasi bir oy ichida 4188,75 dollardan 3981,10 dollargacha arzonlashdi va bu zaxiralarni 3 mlrd dollarga kamaytirdi. Dollarda hisoblanganda oltin zaxirasi kamroqqa, 2,04 mlrd dollarga, 58,04 mlrd dollargacha qisqardi: qayta baholashdagi yoʻqotishlarni metallning fizik hajmi bir oy oldingi 14,34 mln troya unsiyasiga nisbatan 14,58 mln troya unsiyasigacha, yaʼni taxminan 453,5 tonnagacha oʻsishi qisman qopladi. Bu 2013-yilda statistika yuritilishi boshlanganidan beri rekord koʻrsatkichdir. «Gazeta.uz» hisob-kitoblariga koʻra, bir oyda zaxira qariyb 7,5 tonnaga koʻpaydi (UzDaily maʼlumotlariga koʻra, qariyb 7,3 tonnaga).

Zaxiralarning valyuta qismi 921 mln dollarga yoki 15,5 foizga, 5,93 mlrd dollardan 5,01 mlrd dollargacha kamaydi. 2013-yildan beri maʼlumotlar eʼlon qilib kelinayotgan butun vaqt davomida bunchalik past koʻrsatkich boʻlmagan. Xorijiy qimmatli qogʻozlar portfeli 543,2 mln dollarga qisqarib, 1,15 mlrd dollarni tashkil qildi, valyuta va depozitlar hajmi esa 3,86 mlrd dollargacha tushdi. Natijada zaxiralardagi oltinning ulushi 90,2 foizdan 91,2 foizga yetdi.

Yil boshidan buyon zaxiralar 66,31 mlrd dollardan 2,69 mlrd dollarga kamaydi. Agar bir yil oldingi koʻrsatkich bilan, yaʼni 2025-yil 1-noyabr holati bilan taqqoslansa, hozirgi hajm taxminan 4,29 mlrd dollarga koʻp.