«Toshkent» respublika fond birjasi 10-noyabrdan boshlab UCI indeksini uchta UPI indeksi bilan almashtiradi

Mazkur qatorga UPI, UPI FF va UPI EW kiradi. Birja ularni Istiqbolli loyihalar milliy agentligi (ILMA) bilan birgalikda Prezidentning 2025-yil 18-dekabrdagi «Kapital bozorida investitsiya muhitini yaxshilash boʻyicha qoʻshimcha chora-tadbirlar toʻgʻrisida»gi PF-254-son farmonida koʻzda tutilgan islohotlar doirasida ishlab chiqdi. Birja ushbu indekslar «bozor koʻrsatkichlarining shaffofligini hamda ularning xalqaro investorlar uchun qiyoslanuvchanligini oshiradi» deb kutmoqda.

Har uchala indeks umumiy hisoblash bazasiga, qimmatli qogʻozlarni saralab olish va tarkibni yangilash boʻyicha bir xil qoidalarga ega. Farq faqat aksiyalar vaznini aniqlash usulidadir. UPIʼda u emitentning toʻliq bozor kapitallashuviga bogʻliq, UPI FFʼda erkin muomaladagi aksiyalar ulushi (free float) hisobga olingan kapitallashuv inobatga olinadi, UPI EWʼda esa har choraklik qayta koʻrib chiqishda barcha qimmatli qogʻozlarga teng boshlangʻich vazn belgilanadi.

Indekslarga kiritilish uchun emitent soʻnggi eʼlon qilingan yillik hisoboti boʻyicha ijobiy moliyaviy natijaga hamda erkin muomalada kamida 5 foiz aksiyaga ega boʻlishi lozim. Shuningdek, savdo faolligi, likvidlik va qimmatli qogʻozlarning birja kotirovka roʻyxatida boʻlish muddati ham baholanadi.

Yangi indekslar boʻyicha maʼlumotlar, avval UCI boʻyicha boʻlgani kabi, Bloomberg tizimiga uzatib boriladi. Birja bergan axborotga koʻra, ushbu qatorga Refinitiv (LSEG) va Cbonds ham qiziqish bildirgan. Indekslarning ishga tushirilishi birjaning bozor maʼlumotlari va tahlili platformasi — uch bosqichda ishga tushirilishi rejalashtirilgan Umetryx yaratilishi bilan bogʻliq. Birja UPI investitsiya mahsulotlari, shu jumladan birja investitsiya fondlari (ETF) uchun uslubiy asos boʻlib xizmat qiladi deb hisoblamoqda.