2026-yilning III choragida TBC Uzbekistanʼning sof foydasi 61 foizga kamaydi

Iyul–sentabr oylarida segment 15,9 mln lari (taxminan 6,1 mln dollar) ishlab topdi, oʻtgan yilning shu davrida bu koʻrsatkich 41,1 mln larini tashkil etgan edi. Pasayish operatsion xarajatlarning 18 foizga, 92,4 mln larigacha oʻsishi hamda sof foizli daromadning 14,5 foizga, 125 mln larigacha kamayishi fonida yuz berdi. Xarajatlarning daromadlarga nisbati 41,5 foizdan 53,8 foizgacha koʻtarildi, kapital rentabelligi esa 23,3 foizdan 7,8 foizgacha tushdi. Toʻqqiz oy davomida foyda 39,7 foizga kamayib, 57,3 mln larini tashkil qildi.

Yalpi kredit portfeli 2,37 mlrd larini (910 mln dollar) tashkil etdi: u chorak davomida 2,8 foizga oshdi, biroq yil davomida 10,1 foizga qisqardi. Ishlamaydigan kreditlar ulushi oʻtgan yilgi 4,7 foizdan 11,8 foizgacha yetdi. Investorlar uchun taqdimotda uning ikkinchi chorakdagi oʻsishi koʻp jihatdan qarzni hisobdan chiqarish muddatining 270 kundan 360 kungacha uzaytirilgani bilan izohlanadi. TBC Group bosh direktori Vaxtang Butsxrikidze portfelni regulyator talablariga muvofiqlashtirish barobarida Oʻzbekistonda kreditlash bosqichma-bosqich tiklanayotganini taʼkidladi. Uning soʻzlariga koʻra, qarzdorlikni avtomatik undirish qoidalari 2027-yil boshida kuchga kirishi kutilmoqda.

Operatsion koʻrsatkichlar boʻyicha chorak davomida toʻlovlar hajmi 46,5 foizga oʻsib, 43,9 trln soʻmga, tranzaksiyalar soni esa 39 foizga oʻsib, 198 mlntaga yetdi. Roʻyxatdan oʻtgan foydalanuvchilar soni 25,5 mln kishini, oylik faol auditoriya esa 6,1 mln kishini tashkil qildi. Biznes mijozlar soni bir yil ichida besh barobarga koʻpaydi, ularning 84 foizi hududlarda joylashgan.