Anorbank va MB aksiyador haqidagi xabarlar fonida bank odatdagi rejimda ishlayotganini bildirdi

Anorbank matbuot xizmati tarqalayotgan maʼlumotlar faqatgina aksiyadorning shaxsiy masalalariga tegishli ekanini hamda muassasaning kapitali, boshqaruvi yoki operatsion faoliyatiga aloqador emasligini bildirdi. Bank vakolatli organlardan rasmiy tasdiqlar yoki soʻrovlar olinmaganini, barcha operatsiyalar va mijozlar oldidagi majburiyatlar odatdagi tartibda bajarilayotganini taʼkidladi.

Bunga The Insider nashrining anonim manbaga tayanib, bank hammuassisi Oʻzbekistonda odam oʻgʻirlash boʻyicha ish doirasida goʻyoki sirtdan hibsga olingani va xalqaro qidiruvga berilgani haqidagi daʼvolari sabab boʻldi. Shu bilan birga, nashrning oʻzi bunday jinoiy ish mavjudligi toʻgʻrisida rasmiy maʼlumotlar yoʻqligini, Oʻzbekiston huquq-tartibot organlari esa ushbu axborotni tasdiqlamaganini qayd etgan.

Markaziy bank X platformasida alohida aksiyador atrofidagi vaziyat muassasaning moliyaviy barqarorligini belgilamasligini taʼkidladi. Regulyatorning 1-sentabr holatidagi maʼlumotlariga koʻra, bank aktivlari 21,4 trln soʻmni, majburiyatlari esa 19,8 trln soʻmni tashkil etdi. Yuqori likvidli aktivlar ulushi meʼyordagi 10% oʻrniga 16,9% ga, likvidlilikni qoplash koeffitsiyenti 116% ga, tartibga soluvchi kapitalning yetarliligi esa minimal talab boʻlgan 12% oʻrniga 13% ga yetdi.