Toshkent 2027-yilda turkiy dunyoning turizm poytaxtiga aylanadi

Kalitni Oʻzbekiston Turizm qoʻmitasi raisi Abdulaziz Oqqulov qabul qilib oldi. Marosim VI «Qoʻrqut ota» xalqaro turkiy dunyo kinofestivalining yopilishi va taqdirlash marosimi doirasida boʻlib oʻtdi. Kalitni Turkiya madaniyat va turizm vaziri Mehmet Nuri Ersoy topshirdi. Bu turkiy dunyoning 2026-yildagi turizm poytaxti — Anqaraning kalitidir.

Ersoy Oʻzbekistonning tarixiy-madaniy merosi, anʼanalari va turizm salohiyatini qayd etdi. Uning soʻzlariga koʻra, yangi maqom turkiy davlatlarga turizm sohasidagi aloqalarni rivojlantirish uchun qoʻshimcha imkoniyatlar beradi. Oqqulov turkiy mamlakatlar vakillarini kelasi yili Toshkentga kelishga taklif qildi. U kinematograflarga Oʻzbekistonga tashrif buyurishni hamda oʻz ijodiy ishlarida xalqaro auditoriyaga mamlakatning tarixiy shaharlari, tabiati va madaniy merosi haqida soʻzlab berishni taklif etdi.

Festival Istanbulda Turkiya Madaniyat va turizm vazirligi homiyligida boʻlib oʻtdi, deb xabar bergan edi OʻzA. «Atlas-1948» kinoteatridagi ochilish marosimida qirgʻizistonlik yozuvchi Chingiz Aytmatovning hayoti va ijodiga bagʻishlangan film namoyish etildi. Kinofestivalda Oʻzbekiston nomidan rejissyor Dilshodbek Usmonovning «Quyosh oʻgʻli Yusuf» qisqa metrajli filmi namoyish etildi.