Mirziyoyev Kinematografiya agentligini tugatishni topshirdi

Vazirlik tuzilmasida Kino sanʼati departamenti tashkil etiladi, uning rahbari vazir oʻrinbosari maqomini oladi. Departament faoliyatini yoʻlga qoʻyish hamda agentlik va uning tasarrufidagi tuzilmalarni tugatish uchun bir oy muddat berildi. Prezidentning soʻzlariga koʻra, yangi tizim sohani boshqarish, uni moliyalashtirish va film ishlab chiqarish jarayonlarini aniq ajratishi kerak.

“Oʻzbekfilm” davlat muassasasi tugatilib, uning oʻrnida zamonaviy biznes modeliga ega “Oʻzbekfilm” milliy kinokompaniyasi tashkil etiladi; uni bir hafta ichida ishga tushirish topshirildi. Kompaniyaning oʻzi film suratga olmaydi: ishlab chiqarish toʻliq xususiy sektorga oʻtadi. Loyihalarni saralash va moliyalashtirish, kartinalarni ilgari surish va prokat qilish, ularni xorijiy bozorlar hamda festivallarga olib chiqish kompaniya zimmasiga yuklatiladi.

Davlat buyurtmasi oʻrnini subsidiyalar egallaydi, yangi moliyalashtirish mexanizmini bir oy ichida joriy etish topshirildi. “Bundan buyon davlat filmlar boʻyicha buyurtmachi emas, balki ijodkorlar va xususiy sektorning ishonchli hamkori boʻladi”, — dedi Mirziyoyev. Kelgusi yildan boshlab byudjet mablagʻlari har yili kinokompaniyaning talabnomasiga asosan ajratiladi. Prezident avvalgi tizimni tanqid qildi: uning soʻzlariga koʻra, ayrim rejissyorlarga oltitagacha, mualliflarga yettitagacha loyiha toʻgʻri kelgan, buyurtmalarning deyarli yarmi esa davlat kinostudiyalariga berilgan.

“Oʻzbekfilm”ning 10 gektarlik hududida kino ishlab chiqarish xizmatlarini koʻrsatuvchi “Oʻzbekfilm kino-shaharchasi” industrial klasteri tashkil etiladi.