Shuhrat Abbosov Toshkentda vafotidan soʻng Chaplin Awards mukofotiga sazovor boʻldi

Abbosov kinematografiya rivojiga qoʻshgan hissasi uchun vafotidan soʻng taqdirlandi. Mukofotni uning oʻgʻli Eljon Abbosov qabul qilib oldi. Uning soʻzlariga koʻra, bunday eʼtirof oila uchun ham, xalqaro maydondagi oʻzbek kinosi uchun ham muhim ahamiyatga ega.

Mukofot Madaniyat vazirligi koʻmagida The Hollywood Reporter nashri bilan hamkorlikda tashkil etildi. Tarixiy filmlardagi kuchli ayol rollari uchun rossiyalik aktrisa Leonela Manturova “Oltin hassa” mukofotiga loyiq koʻrildi. Uni shaxsan Charli Chaplinning nabirasi Kiara Chaplin topshirdi. The Hollywood Reporter, shuningdek, Boris Xanchalyanga Featured Producer maqomini berdi. Bundan tashqari, nashr “Chempionlar vatani: Islom Maxachev” filmining bosh prodyuserlaridan biri boʻlgan rossiyalik mediamenejer Alina Zinnatullinani eʼtirof etdi va u kartinani sahnada tanishtirdi.

Dasturni matbuot anjumani ochib berdi. Unda madaniyat vaziri Ozodbek Nazarbekov, vazirning birinchi oʻrinbosari va Kinematografiya agentligi direktori Jahongir Ahmedov hamda Kiara Chaplin ishtirok etdi. OʻzA xabariga koʻra, vazir xalqaro tadbirlarning madaniy aloqalar uchun ahamiyati hamda Buyuk ipak yoʻli anʼanalari zamonaviy ijodiy hamkorlikda oʻz aksini topayotgani haqida soʻzladi. Kiara Chaplin bobosining ijodida insonparvarlik, samimiylik va ezgulik muhim oʻrin tutganini taʼkidladi.

Oqshom zoʻravonlikka duch kelgan bolalar haqidagi “Haqqim bor” filmining namoyishi bilan yakunlandi. Kartinaning Oʻzbekistondagi premyerasi 2025-yilda boʻlib oʻtgan.