Toshkentda 25-oktabr kuni Ruminiyaning "Yurfak toʻdasi" filmi namoyish etiladi

Seans Alisher Navoiy nomidagi Oʻzbekiston Milliy kino sanʼati saroyida boʻlib oʻtadi. 2025-yilgi ushbu kartinani ssenariy muallifi Emanuel Pirvu boʻlgan rejissor Mixaela Anitsey suratga olgan, bosh rollarni Tudor Kuku-Dumitresku va Ileana Puyu ijro etgan. Syujet markazida ogʻir sinovlarga duch kelgan yuridik fakultetining yetti nafar talabasi turadi. Annotatsiyaga koʻra, film doʻstlik, birdamlik va bir-birini qoʻllab-quvvatlashga tayyorlik haqida hikoya qiladi.

Namoyish Ruminiya elchixonasi va Yevropa Ittifoqi Delegatsiyasi tomonidan tayyorlandi, Oʻzbekiston Respublikasi Madaniyat vazirligi huzuridagi Kinematografiya agentligi koʻmak koʻrsatdi. Kirish bepul. Film asl tilida namoyish etiladi, subtitrlar oʻzbek tilida boʻladi.

Ruminiya kinosi poytaxtda 2022-yildan buyon muntazam ravishda namoyish etib kelinmoqda. Oʻshanda birinchi "Ruminiya kinosi kunlari"da tomoshabinlar Tedi Nekulaning "Mening yonimda" va Serjiu Nikolayeskuning "Daklar" filmlarini koʻrgan, Tedi Nekula va aktyor Adrian Peduraru esa ijodiy uchrashuvlar oʻtkazgan edi. Ikkinchi "Kunlar" oʻtgan yili boʻlib oʻtdi va ikki mamlakat oʻrtasidagi diplomatik munosabatlarning 30 yilligiga bagʻishlandi: oʻshanda Marian Krishanning "Harbiy bola" va Ana-Mariya Komeneskuning "Xoriya" filmlari namoyish etilgan edi.