Soʻrovnoma-2026: Telegram Oʻzbekistonda yangiliklar manbasi sifatida televideniyeni ortda qoldirdi

Soʻrovda qatnashganlarning 51,6 foizi Telegram-kanallarni, 44,6 foizi televideniyeni, 41,6 foizi esa ijtimoiy tarmoqlarni yangiliklar manbasi sifatida koʻrsatgan. Ishonch darajasi esa boshqacha taqsimlandi: birinchi oʻrinda televideniye (44,3%), keyingi oʻrinlarda davlat organlarining rasmiy saytlari (17,3%), Telegram-kanallar (11,3%) va yangiliklar saytlari (7,4%). 18–24 yoshdagilar orasida 66,2% yangiliklarni Telegramʼdan, 54,4% ijtimoiy tarmoqlardan oladi, 55 yoshdan kattalarda esa birinchi oʻrin televideniyega tegishli — 77,4%.

Soʻrovnoma ishtirokchilarining 86,1 foizi Telegram, 64,8 foizi ijtimoiy tarmoqlar foydalanuvchilaridir; ijtimoiy tarmoqlardan foydalanuvchilarning 92,7 foizi Instagramʼda oʻtiradi. Tomoshabinlarning 52,8 foizi Oʻzbekiston 24 telekanalini eng ishonchli deb hisoblaydi, ommaboplik boʻyicha esa Milliy TV yetakchilik qilmoqda (44,5%). Soʻrovda qatnashganlarning 21,9 foizi radio tinglaydi.

Respondentlarning 46,6 foizi soxta yangiliklarni mediasohaning asosiy xavfi deb biladi, ular bilan eng koʻp YouTubeʼda, Telegramʼda va ijtimoiy tarmoqlarda toʻqnash kelishadi. OAVning notoʻgʻri maʼlumotlar uchun yanada qatʼiyroq javobgarlikka tortilishini 77,4% qoʻllab-quvvatlagan. Narxlar, daromadlar, bandlik va ijtimoiy qoʻllab-quvvatlash haqidagi maʼlumotlarning yetishmasligini 41,3%, odamlarning kundalik muammolari haqidagi maʼlumotlar yetishmasligini 40,6% bildirgan. Soʻz erkinligi darajasini 49,7% yuqori deb atagan.

Yashash joyi boʻyicha yuzma-yuz intervyular 2026-yilning 8-sentabridan 19-sentabriga qadar oʻtkazildi, ularda barcha 14 hududdan 18 yosh va undan katta boʻlgan 1411 kishi ishtirok etdi. Tadqiqotni Mass-media fondi, Yevropa Ittifoqining Oʻzbekistondagi Delegatsiyasi va Prezident Administratsiyasi huzuridagi OAV uchun kontent tayyorlash markazi oʻtkazdi, dala bosqichini «Ijtimoiy fikr» markazi bajardi.