Mirziyoyev 2027-yilda barcha hududlarda migratsiya markazlarini tashkil etishni topshirdi

Topshiriq mehnat migratsiyasiga bagʻishlangan yigʻilishda berildi. Markazlar faoliyati yoʻlga qoʻyilishidan oldin viloyat hokimlarining birinchi oʻrinbosarlari «Intil» xalqaro oʻquv markazi tajribasini oʻrganishi lozim boʻladi. Prezident elchixonalar, hokimliklar va taʼlim muassasalarini fuqarolarni xorijdagi yuqori maoshli ishlarga joylashtirish boʻyicha ishlar yetarli emasligi sababli tanqid qildi. Keltirilgan maʼlumotlarga koʻra, 2026-yilda Germaniyadan 45 ming nafar mutaxassis uchun buyurtma kelib tushgan, ammo bor-yoʻgʻi 2000 kishi ishga joylasha olgan; asosiy toʻsiq sifatida nemis tilini biladigan kadrlar yetishmasligi koʻrsatildi.

2027-yilga kelib 10 ming nafar kishini talab yuqori boʻlgan kasblarga hamda nemis tiliga oʻqitish va ularni Germaniyada ish bilan taʼminlash vazifasi qoʻyildi. Oʻsha yili maktab va texnikumlarga nemis tilida soʻzlashuvchi 500 nafar mutaxassisni taklif qilish rejalashtirilmoqda, OTMlarda ushbu til oʻqituvchilarini tayyorlash boʻyicha davlat buyurtmasi esa keyingi oʻquv yilidan ikki baravar oshishi lozim. «Nemis tilini oʻqitishga ham yoshlarga ingliz tilini oʻrgatish kabi yondashuv zarur», — dedi Mirziyoyev.

Bir oy ichida dasturlari 2027-yildan boshlab xorijiy ish beruvchilar talablariga moslashtiriladigan 20 ta texnikumni saralab olish topshirildi. Prezidentning soʻzlariga koʻra, Oʻzbekiston texnikumlarida kadrlar tayyorlashga Germaniya, Yaponiya va Janubiy Koreyaning yirik kompaniyalari qiziqish bildirmoqda. Bundan tashqari, har bir viloyatda ikkitadan uchtagacha texnikumni yirik tadbirkorlarga 15 yilga boshqaruvga berish rejalashtirilmoqda; ular har yili kamida 30 ming nafar mutaxassis tayyorlab chiqarishi kerak. Tadbirkorlarning oʻqitish va jihozlashga qilgan xarajatlarini toʻlangan soliqlar hisobiga kiritish koʻzda tutilgan, shuningdek, xorijda muvaffaqiyatli ishga joylashgan har bir bitiruvchi uchun grantlar ajratiladi.