Mirziyoyev mehnat migratsiyasi masalalari boʻyicha yigʻilish oʻtkazmoqda

Nashr maʼlumotlariga koʻra, davlat rahbari jahon mehnat bozoridagi oʻzgarishlarga eʼtibor qaratgan. Hozirda dunyo boʻyicha 168 mln kishi tashqi migratsiyada boʻlib turibdi. Oʻzbekistonda xorijda ishlash istagida boʻlgan fuqarolar bor, boshqa mamlakatlarda esa ishchi kuchiga talab yuqori. Soha masʼullari va hududlar rahbarlari oldiga ushbu ikki imkoniyatni bogʻlash asosiy vazifa qilib qoʻyildi.

«Inson oʻz kasbini mukammal egallashi, oʻz qadrini bilishi va oʻz davlatiga tayana olishi kerak», — dedi prezident.

Xabarda qayd etilishicha, ilgari Oʻzbekiston uyushgan mehnat migratsiyasi doirasida uchta davlat bilan ishlagan boʻlsa, endilikda ular soni 27 taga yetgan. Hamkorlik yoʻlga qoʻyilgan yirik xorijiy ish beruvchilar soni deyarli 400 taga koʻpaydi.

Oʻn yil ichida chet elda ishlayotgan Oʻzbekiston fuqarolari soni ikki barobarga kamaygan, ammo ularning oʻz oilalariga yuborayotgan mablagʻlari toʻrt barobarga oshgan. Prezidentning soʻzlariga koʻra, bu xalqaro mehnat bozorida oʻzbekistonlik mutaxassislarga boʻlgan munosabat oʻzgarganidan hamda odamlar oddiy ishchi emas, balki malakali kadr sifatida ketayotganidan dalolat beradi.