Noyabrda ehtiyojmand oilalar isitish mavsumi uchun 1 mln soʻmdan oladi

Pullar Ijtimoiy reyestrdagi oilalarga toʻlanadi. Reyestrga kirmagan xonadonlar, agar ularning har bir aʼzosiga toʻgʻri keladigan oʻrtacha oylik daromadi eng kam isteʼmol xarajatlarining (EKIX) ikki baravaridan oshmasa, ushbu toʻlovga daʼvogarlik qilishi mumkin. Ular uchun «mahalla yettiligi» xulosasi asos boʻladi. Markazlashtirilgan isitish tizimiga ega koʻp qavatli uylarda yashovchilar uchun oʻz chegarasi mavjud: Qoraqalpogʻiston va viloyatlarda EKIXning ikki baravari, Toshkentda esa EKIXning uch baravari. Daromadlari ushbu koʻrsatkichlardan yuqori boʻlgan oilalarga tuman yoki shahar shtabi ayrim hollarda yordam tayinlashi mumkin.

Toʻlov, shuningdek, oʻzgalar parvarishiga muhtoj boʻlgan va tegishli reyestrda turgan yolgʻiz yashovchi keksalar hamda nogironligi boʻlgan shaxslarga, shuningdek yetim bolalar va ota-ona qaramogʻidan mahrum boʻlgan bolalar tarbiyalanayotgan oilalarga ham beriladi.

Farmon yordamning boshqa turlari boʻyicha daromad chegaralarini ham oshirmoqda. Elektr energiyasi va tabiiy gaz xarajatlarini kompensatsiya qilish huquqi endi bir kishi hisobiga bir yarim oʻrniga EKIXning ikki baravarigacha, koʻmir sotib olishdagi yordam uchun esa bir oʻrniga EKIXning ikki baravarigacha boʻlgan daromadda saqlanib qoladi. Xuddi shunday mezon kommunal xizmatlar boʻyicha qarzdorlikni soʻndirish, joriy xarajatlarni toʻlash va yoqilgʻi xarid qilish amalga oshiriladigan «Saxovat va koʻmak» jamgʻarmasi mablagʻlaridan koʻrsatiladigan yordamga ham tatbiq etiladi.

Bazaviy meʼyor doirasidagi tariflar bilan elektr energiyasi hamda gazning meʼyordan ortiqcha isteʼmoli tariflari oʻrtasidagi tafovutni kompensatsiya qilish muddati 2028-yil 1-aprelgacha, koʻmir xarajatlarini qisman qoplash esa 2029-yil 1-yanvargacha uzaytirildi.