«Dok-1 Maks» ishi boʻyicha bolalarning oilalariga 80 mlrd soʻm kompensatsiya toʻlandi

Sud qaroriga koʻra, 90 nafar jabrlanuvchiga jami 82 mlrd soʻm toʻlanishi lozim edi. Ushbu mablagʻlar mahkumlardan, jumladan, ularning xatlangan mol-mulkini sotish hisobidan undirilishi kerak edi. Mol-mulkni sotish choʻzilib ketdi va byudjet mablagʻlari ajratilguniga qadar oilalar 16,8 mlrd soʻm yoki ushbu summaning qariyb 20 foizini oldi. Vazirlik maʼlumotlariga koʻra, byudjetdan mablagʻlar prezidentning zararni qoplashni jadallashtirish toʻgʻrisidagi topshirigʻi asosida ajratilgan.

Sogʻliqni saqlash vazirligi maʼlumotlariga binoan, vafot etgan 72 nafar bolaning oilalari 72,2 mlrd soʻm, davolangan yoki davolanishni davom ettirayotgan 16 nafar bolaning oilalari esa 7,8 mlrd soʻm oldi. Yana 2 mlrd soʻm bank kartalari bilan bogʻliq texnik masalalar hal etilgach, ikki oilaga oʻtkazib beriladi. Vazirlik byudjetdan ajratilgan 65,2 mlrd soʻmni mahkumlarning mol-mulkini sotish va ulardan undiruvlar hisobidan gʻaznaga qaytarishni rejalashtirmoqda; qaytarish muddatlari koʻrsatilmagan.

Gazeta.uz ota-onalarga tayanib, pullar 20–24-oktabr kunlari tushganini xabar qildi; nashrga toʻlovlarni Bosh prokuratura huzuridagi Majburiy ijro byurosi matbuot kotibi Farrux Toshpoʻlatov tasdiqladi. Sogʻliqni saqlash vazirligi xabar berishicha, ayni paytda vazirlik va boshqa idoralar vakillari respublika tibbiyot markazlari shifokorlari bilan birga bolalarga qoʻshimcha tibbiy va psixologik yordam koʻrsatishni tashkil etish maqsadida oilalarga tashrif buyurmoqda.

Birinchi instansiya sudi mazkur ish boʻyicha hukmni 2024-yil fevral oyida chiqargan edi. Farmatsevtika tarmogʻini rivojlantirish agentligining sobiq rahbarlari va dori vositalari ishlab chiqaruvchisining Oʻzbekistondagi rasmiy distribyutori — Quramax kompaniyasi vakillari sudlangan.