Toshkentning Yunusobod va Yangihayot tumanlarida 27-oktabr kuni gaz oʻchiriladi

Yunusobod tumanida gaz 09:00 dan 18:00 gacha boʻlmaydi: “Firdavsiy” mahallasi hududida mutaxassislar past bosimli yerosti gaz quvurini koʻchirmoqda. Gaz taʼminotidagi uzilish “Buyuk Turon” mahallasidagi “Barokko” turar joy majmuasidagi koʻp qavatli uyning 250 ta xonadoniga, “M. Ulugʻbek” mahallasidagi Osiyo 2-tor koʻchasida joylashgan 120 ta xususiy xonadonga hamda 30 ta korxonaga taʼsir qiladi. Ular orasida “Mahalla 90” va “Sardoba” kafelari, shuningdek, “Zebu Zar” toʻyxonasi ham bor.

Yangihayot tumanida ishlar 11:00 dan 16:00 gacha olib boriladi. “Yorqin hayot” mahallasida eskirgan gaz taqsimlash punkti yangi uskunaga almashtiriladi. Ushbu vaqtda Yoʻldosh-16 (Sputnik-16) massividagi koʻp qavatli uyning 150 ta xonadoni va ikkita korxona gazsiz qoladi.

Kompaniya vakillarining soʻzlariga koʻra, taʼmirlash ishlari yakunlangach, gaz taʼminoti bosqichma-bosqich qayta tiklanadi. “Hududgaz Poytaxt” aholi va tadbirkorlardan keltirilgan noqulayliklar uchun uzr soʻradi.