Poytaxt Parking toshkentliklarni toʻxtash joyi uchun qarz haqidagi soxta SMSʼlardan ogohlantirdi

Kompaniya maʼlumotlariga koʻra, xabarlar Filippin (+63) va Marokashning (+212) xalqaro kodlariga ega raqamlaridan kelmoqda, biroq boshqa raqamlardan ham foydalanilishi istisno etilmaydi. Qabul qiluvchiga toʻxtash joyi uchun qarzdorlik haqida yoziladi va tashqi koʻrinishidan rasmiy sayt manzilini eslatuvchi, ammo servisga aloqador boʻlmagan havola orqali oʻtish taklif qilinadi. Agar «qarz» toʻlanmasa, joʻnatuvchilar servis xizmatlaridan foydalanish imkoniyatini cheklash bilan poʻpisa qiladi.

Poytaxt Parking bunday SMSʼlarni oʻchirib tashlashni, havolalarni ochmaslikni hamda bank kartasi maʼlumotlarini ham, avtomobil raqamini ham kiritmaslikni tavsiya qiladi. Rekvizitlarni allaqachon kiritib boʻlganlarga esa kompaniya zudlik bilan oʻz banki bilan bogʻlanishni va kartani bloklashni maslahat beradi. Toʻlov holatini, operator soʻzlariga koʻra, faqat Poytaxt Parking rasmiy ilovasida bilish mumkin, savollar bilan esa 78-113-67-00 telefon raqami yoki Telegramʼdagi qoʻllab-quvvatlash botiga murojaat qilish kerak.

Kursiv Oʻzbekiston ommaviy shartnomaga koʻra operator haqiqatan ham foydalanuvchini qarzdorlik toʻgʻrisida xabardor qilishi, toʻlov 24 soat davomida kelib tushmagan taqdirda esa unga servis funksiyalarining bir qismini yopib qoʻyishi mumkinligiga eʼtibor qaratdi. Shartnoma qarzni rasmiy ilovada yoki tizimda nazarda tutilgan boshqa usullar orqali soʻndirishni taklif etadi. Toshkentda pulli toʻxtash joylari sinov rejimida 2025-yil may oyida ishga tushirilgan edi.