Mirziyoyev «Onlayn mahalla» orqali migrantlarga yordam koʻrsatishni yoʻlga qoʻyishni topshirdi

Yigʻilish Toshkent shahrining Uchtepa tumanidagi «Intil» xalqaro tillar va kasblarga oʻqitish markazida boʻlib oʻtdi. Tizim ishga tushirilgach, chet eldagi fuqaro elchi yoki konsulni oʻzi qidirib yurishi shart boʻlmaydi: platformada murojaat qoldirishning oʻzi kifoya. Zarur boʻlsa, elchining oʻzi arizachi huzuriga borib, muammoni hal etishga va uning huquqlarini himoya qilishga yordam beradi. Masʼullarga tizimning samarali ishlashini taʼminlash boʻyicha takliflar tayyorlash ham topshirildi.

«Xorijda ishlayotgan har bir vatandoshimiz — oʻz oilasi farovonligi, farzandlarining kelajagi yoʻlida tinimsiz mehnat qilayotgan chinakam matonatli inson», — dedi davlat rahbari. Uning soʻzlariga koʻra, xorijda ishlayotgan fuqarolarning hech biri oʻz muammolari bilan yolgʻiz qolmasligi kerak. Matbuot xizmati mehnat migranti endilikda faqat pul joʻnatuvchi shaxs sifatida emas, balki davlat himoyasiga va hurmatga loyiq fuqaro sifatida koʻrilayotganini taʼkidladi.

Hokimlarga xorijda ishlayotgan fuqarolarning oilalari va ota-onalari farovon yashashi, farzandlari esa sifatli taʼlim olishi haqida gʻamxoʻrlik qilish vazifasi topshirildi. Bundan tashqari, xorijdagi boʻsh ish oʻrinlari toʻgʻrisidagi maʼlumotlarni davlat, zarur kasblar, tilga qoʻyiladigan talablar va kerakli oʻquv kurslarini koʻrsatgan holda har bir mahallaga yetkazish rejalashtirilmoqda. «Mahalla yettiligi» istak bildirganlarga imkoniyatlar haqida soʻzlab beradi va ularni «Onlayn mahalla» tizimiga kiritadi, shundan soʻng sohaviy organlar nomzodlarni kasb va tilga oʻqitadi hamda ishga joylashishiga koʻmaklashadi. Bu ishlarning borishini viloyat hokimlari oyiga bir marta, tuman hokimlari esa oyiga ikki marta tekshirib boradi.