Oʻzbekiston Qahramoni va fermer Parda Ziyatov vafot etdi

Parda Ziyatov 1947-yilda Jizzax viloyatining Sharof Rashidov tumanida tugʻilgan. Samarqand qishloq xoʻjaligi texnikumini agronomlik mutaxassisligi boʻyicha tamomlab, harbiy xizmatni oʻtaganidan soʻng, mehnat faoliyatini Hamroqul Nosirov nomidagi xoʻjalikda tabelchi sifatida boshlagan, keyinchalik u yerda brigadani boshqargan va bosh pudratchi boʻlgan.

2003-yildan 2018-yilgacha Ziyatov Sharof Rashidov tumanidagi «Quyoshsevar Parda» fermer xoʻjaligiga rahbarlik qilib, paxtachilik va gʻallachilikni rivojlantirgan. Qishloq xoʻjaligi sohasidagi koʻp yillik mehnati uchun u «Oʻzbekiston Qahramoni» unvoni bilan taqdirlangan.

Ziyatov yerda ishlashdan tashqari davlat faoliyati bilan ham shugʻullangan: 1990–1995-yillarda Oliy Majlis deputati, 2005–2015-yillarda Oliy Majlis Senati aʼzosi boʻlgan, shuningdek, xalq deputatlari viloyat va tuman Kengashlari deputati etib saylangan. Uning vafoti munosabati bilan Oʻzbekiston Prezidenti Shavkat Mirziyoyev, parlament palatalari rahbariyati va Bosh vazir hamdardlik bildirdi.