Chilonzor tumanida koʻl va 30 metrli arkaga ega dam olish zonasi qurilmoqda

Loyiha uchun 2,3 gektar (23 ming kv. metr) yer ajratilgan boʻlib, shundan 18,7 ming kv. metri hajmi qariyb 37,4 ming kub metr suvni tashkil etadigan koʻl uchun ajratilmoqda. Toshkent shahar hokimligi huzuridagi «Yagona buyurtmachi xizmati» injiniring kompaniyasi buyurtmachi sifatida qatnashmoqda, loyihalash bilan «Lider Prof Proyekt» MCHJ shugʻullanmoqda. Obyekt Magic City majmuasi hamda «Milliy bogʻ» parki yaqinida joylashadi; hokimlik u ishga tushirilgach, kuniga 3 ming nafargacha odam tashrif buyurishini kutmoqda.

Loyiha obodonlashtirish va koʻkalamzorlashtirishni koʻzda tutadi: hududda 150 tup daraxt va buta ekiladi. Bundan tashqari, piyodalar va velosipedchilar uchun 4,6 km yoʻlaklar yotqizish hamda ikkita favvora oʻrnatish rejalashtirilgan.

Asosiy meʼmoriy elementlardan biri aylanuvchi qismga ega balandligi 30 metrli arka boʻlishi kerak. Uning konsepsiyasi ustida ishlash jarayonida italiyalik mutaxassislarning dastlabki gʻoyalari oʻrganilib, keyinchalik mahalliy loyihachilar tomonidan takomillashtirildi va moslashtirildi. Loyiha tashkiloti murakkab konstruktiv va mexanik yechimlar boʻyicha xorijiy, shu jumladan xitoylik mutaxassislar bilan texnik hamkorlik imkoniyatini koʻrib chiqmoqda, dastlabki loyihalash bosqichida esa arka ichida ikkita lift boʻlishi variantini oʻrganmoqda.

Spot.uz qayd etishicha, eʼlon qilingan fotosuratlar va renderlar suv havzasi Milliy bogʻda, Oliy Majlis binosi yaqinida qayta tiklanayotganidan dalolat beradi. Hokimlik ishlar qiymati, moliyalashtirish manbalari va yakunlash muddatlarini maʼlum qilmadi.