Oʻzbekistonda ish joyidagi zoʻravonlik va tazyiqlar boʻyicha shikoyatlar portali ishga tushiriladi

“Mehnat sohasida xavfsiz va hurmatga asoslangan ish muhitini taʼminlash chora-tadbirlari toʻgʻrisida”gi hujjat taʼqib, shilqimlik, psixologik bosim va kamsitishlarning oldini olishga qaratilgan. Yangi raqamli tizim murojaatlarni masofadan roʻyxatga olish, dalillarni toʻplash, xulosalar tayyorlash va tekshiruv natijalarini kuzatib borish imkonini beradi.

Qaror ariza beruvchining shaxsiy maʼlumotlari himoyasini kafolatlaydi — qonunda nazarda tutilgan holatlardan tashqari ularni oshkor qilish taqiqlanadi. Agar murojaat rahbarga qarshi qaratilgan boʻlsa, manfaatlar toʻqnashuvining oldini olish maqsadida tizim uni avtomatik tarzda yuqori turuvchi organga yuboradi. Oʻz huquqlarini himoya qilgani uchun xodimning mehnat sharoitlarini yomonlashtirish yoki unga intizomiy choralar qoʻllash taqiqlanadi. Zarur hollarda platformaga murojaatlarni “112” raqami orqali vakolatli organlarga yoʻnaltirish imkoniyati integratsiya qilinadi.

Davlat organlari va tashkilotlari xodimlari har yili qisqa muddatli oʻquv kurslaridan oʻtadilar. Har bir davlat organida portalni yuritish va profilaktik treninglar oʻtkazish uchun kamida bitta masʼul shaxs tayinlanadi. Nodavlat tuzilmalar ushbu imkoniyatlarga dmi.mehnat.uz tizimi orqali ixtiyoriy ravishda ulanishlari mumkin boʻladi.