Nukusda 50 ming aholiga moʻljallangan massiv qurilishi boshlandi

Massiv shaharning shimoli-sharqida 270 gektar maydonni egallaydi. Davlat rahbarining soʻzlariga koʻra, xorijiy investorlarni jalb qilgan holda u yerda koʻp qavatli binolar, biznes, savdo va xizmat koʻrsatish majmualarini barpo etish, shuningdek, energiya tejovchi texnologiyalardan foydalangan holda yashil hududlarni tashkil qilish rejalashtirilgan.

Yigʻilishda Qoraqalpogʻistonda shahar muhitini rivojlantirish masalasi ham muhokama qilindi. Prezident Nukus shahridagi Mustaqillik koʻchasida tunu kun ishlaydigan hudud tashkil etilganini, u yerda 28 ta korxona ochilib, yana 50 tasi oʻz biznesini kengaytirganini, natijada haftalik tushum ikki barobar oshganini qayd etdi. Bundan tashqari, "Nur" va "Elobod" mahallalarini Toshkentning "Kichqiriq" mahallasi andozasida obodonlashtirish, mahalliy bogʻni esa Navroʻz bayramigacha rekonstruksiya qilishga qaror qilindi.

Kegeyli tumanida 3,5 kilometr uzunlikdagi yopiq kanal oʻrnida 100 ta xizmat koʻrsatish obyektining qurilishi boshlandi, u yerda 320 nafargacha kishini ish bilan taʼminlash koʻzda tutilgan. Viloyatlar hokimlariga Navroʻzga qadar biriktirilgan tumanlarning kamida bitta koʻchasi va bitta mahallasida shunga oʻxshash obodonlashtirish loyihalarini amalga oshirish topshirildi.