Toshkentda uy-joylarni ommaviy baholash muhokamasi 4-dekabrgacha uzaytirildi

Muhokama 5-sentabrda boshlangan boʻlib, 60 kunga moʻljallangan edi, endilikda u yana 30 kunga uzaytirildi. Yagona interaktiv davlat xizmatlari portali orqali 721 632 nafar mulkdorga bildirishnoma yuborilgan, ularni 380 525 kishi (52,7%) oʻqib chiqqan. Yana 584 343 nafar mulkdorga natijalar SMS orqali joʻnatilgan.

5-noyabr holatiga koʻra 11 035 nafar mulkdor oʻz munosabatini bildirgan. Ulardan 5535 nafari (50,15%) baholashga rozi boʻlgan, qolgan 5500 nafari esa shikoyat va takliflar yuborgan. 3210 nafar mulkdor qiymatni oshirib yuborilgan, 1753 nafari esa bozor narxiga nisbatan pasaytirilgan deb hisoblagan. Kadastr hujjatlaridagi xatolar haqida 273 kishi xabar bergan, yana 264 nafari qoʻshimcha takliflar kiritgan.

Sultonovning soʻzlariga koʻra, muhokamada qatnashish majburiy emas, natijalarning oʻzi esa huquqiy oqibatlarga olib kelmaydi. Milliy markazda, shuningdek, mulkdorning eʼtirozlarisiz baholash qayta koʻrib chiqilmasligini qayd etishdi, soliqlar baholangan qiymatga mutanosib ravishda oshishi haqidagi xavotirlarni esa asossiz deb atashdi. Iqtisodiyot va moliya vaziri oʻrinbosari Ahadbek Haydarov avvalroq idora soliq stavkalarini bir necha barobar pasaytirish boʻyicha takliflar tayyorlaganini maʼlum qilgan edi.

Tajriba 600 mingdan ortiq kvartira va 215 mingta xususiy uyni qamrab oldi. Iqtisodiyot va moliya vazirligi maʼlumotlariga koʻra, kvartiralar jami 426,7 trln soʻmga baholangan — bu kadastr qiymatidan deyarli 7,4 baravar yuqori, xususiy uylar esa kadastr boʻyicha 39 trln soʻmga nisbatan 587 trln soʻmga baholangan. Vazirlik bu farqni kadastrda yer qiymati toʻliq hisobga olinmasligi bilan izohladi.