Toshkent viloyatida 500 kV li podstansiya ishga tushirildi, loyiha qiymati 171,4 mln dollarni tashkil etdi

Podstansiyaning quvvati (ayrim xabarlarda u «Halqa» deb atalgan) 1602 MVA ni tashkil etadi. U bilan birga 285 km uzunlikdagi yangi elektr uzatish havo liniyalari qurildi: 213 km 220 kV li va 72 km 500 kV li. Obyekt Toshkent shahri va viloyatning bir qismini elektr bilan taʼminlashni yanada ishonchli, amaldagi tarmoqlarga yuklamani taqsimlashni esa maqbulroq qilishi kerak. Energetika vazirligida podstansiyani «Oʻzbekiston yuqori kuchlanishli infratuzilmasining eng yirik va zamonaviy obyektlaridan biri» deb atashdi. Hozirda yangi obyektlar mamlakatning yagona energetika tizimiga ulanmoqda, bu ishlar yakuniy bosqichda.

Shuningdek, oqimlarning qayta taqsimlanishi Toshkent IESga tushadigan yuklamani kamaytirishi kutilmoqda. Mavjud maʼlumotlarga koʻra, bu stansiyaga mazutdan yoqilgʻi sifatida foydalanishni toʻxtatish va ifloslantiruvchi moddalar tashlamalarini qisqartirish imkonini beradi.

Jahon banki maʼlumotlariga koʻra, bu boshqaruv va monitoring zamonaviy raqamli texnologiyalar qoʻllangan holda amalga oshiriladigan Oʻzbekistondagi ilk podstansiyadir. U elektr energiyasini Sirdaryo viloyatidagi stansiyalardan hamda mamlakat janubi-gʻarbidagi shamol elektr stansiyalaridan oladi.

Podstansiya «Oʻzbekiston milliy elektr tarmoqlari» kompaniyasi Jahon bankining moliyaviy koʻmagida amalga oshirayotgan 380 mln dollarlik «Elektr energetika sektorini transformatsiya qilish va elektr energiyasini barqaror uzatish» loyihasiga kiradi. Loyiha 2021-yilda maʼqullangan. U shuningdek, deyarli barcha hududlarda 22 ta eskirgan yuqori kuchlanishli podstansiyani rekonstruksiya qilish, modernizatsiyalash va kengaytirish hamda elektr uzatish liniyalarini qurishni oʻz ichiga oladi.