Havo sovushi sababli AYOQSHlar faoliyati vaqtincha cheklanishi mumkin — Energetika vazirligi

Vazirlik metan «zapravka»larini gazning mavsumiy isteʼmolchilari toifasiga kiritdi. Yoqilgʻi birinchi navbatda aholi xonadonlariga, shuningdek maktablar, bolalar bogʻchalari, shifoxonalar va boshqa ijtimoiy muassasalarga yoʻnaltiriladi. Vazirlik matbuot xizmati xabariga koʻra, cheklovlar hokimliklar bilan kelishilgan holda tasdiqlangan grafiklar asosida kiritiladi, isteʼmolchilar esa bu haqda oldindan ogohlantiriladi.

Energetika vazirligi Oʻzgidromet prognoziga tayanmoqda: 9-noyabrdan 11-noyabrgacha havo haroratining keskin pasayishi va yomgʻir yogʻishi kutilmoqda, togʻlarda qor yogʻishi mumkin. Tungi soatlarda shimoliy hududlarda harorat −2…−7 °C gacha, qolgan hududlarda −1…−2 °C gacha pasayadi. Kunduzi termometr koʻrsatkichlari mos ravishda +3…+8 va +7…+12 °C ni tashkil etadi. Vazirlik taʼkidlaganidek, Toshkentda va yana bir qator hududlarda isitish mavsumiga tayyorgarlik koʻrilmoqda.

Gaz bosimi va taʼminotiga doir shikoyatlar 1104 raqami orqali tunu kun qabul qilinadi, gaz transport tizimidagi avariyalar haqida 104 raqamiga, elektr taʼminotidagi uzilishlar boʻyicha 1154 raqamiga xabar berish mumkin. Yoqilgʻi-energiya resurslaridan noqonuniy foydalanish holatlari toʻgʻrisidagi maʼlumotlarni «Oʻzenergoinspeksiya» +998 71 208-10-15 telefon raqami orqali qabul qiladi.

Vazirlik, shuningdek, isitish va gaz uskunalarining, dudburon hamda shamollatish tizimlarining sozligini tekshirishni, xonalarni gaz plitasi yordamida isitmaslikni, rozetka va simlarga ortiqcha yuklama bermaslikni hamda yoqilgan isitgichlarni qarovsiz qoldirmaslikni tavsiya qildi.