Davlat aktivlari agentligi Turkiya ishbilarmonlar kengashi bilan memorandum imzoladi

Hujjatni agentlik direktori Sohibjon Murodov va kengash raisi Oʻzgur Onur Oʻzgyuven imzoladi. Memorandum turk kompaniyalari xususiylashtirish jarayoni toʻgʻrisida maʼlumotlar olishini, tomonlar esa investitsiyaviy takliflar almashishni boshlashini va tizimli hamkorlikni yoʻlga qoʻyishini nazarda tutadi. Dekabr oyida turk investorlari uchun alohida panel sessiyasi oʻtkazilishi rejalashtirilgan boʻlib, unda Oʻzbekistonning davlat aktivlari va ularni sotib olish shartlari taqdim etiladi.

Murodovning soʻzlariga koʻra, Prezident farmoni ijrosi doirasida 2026–2027-yillarda 84 ta korxonadagi davlat ulushi, 1242 ta koʻchmas mulk obyekti va deyarli 8 ming gektar yer savdoga chiqariladi. Uning maʼlumotlariga koʻra, lotlarning umumiy qiymati qariyb 100 trln soʻmni tashkil etadi. Olti oy ichida hisob-kitob qilgan xaridor 25% chegirmaga ega boʻladi, yetti yilga boʻlib toʻlanganda foizlar hisoblanmaydi, obyektni rekonstruksiya qilishga esa uning qiymatining kamida yarmi toʻlangandan soʻng kirishish mumkin. OʻzA maʼlumotlariga koʻra, soʻnggi yillarda turk investorlari Oʻzbekistonda deyarli 366 mln dollarlik 30 dan ortiq davlat aktivini sotib olgan.

Oʻzgyuven, shuningdek, Oʻzbekiston Savdo-sanoat palatasida palata raisi oʻrinbosari Akmaljon Mamajonov bilan muzokaralar oʻtkazdi, deb xabar beradi UzDaily. Tomonlar 29-noyabrdan 5-dekabrgacha Toshkentda boʻlib oʻtadigan «Yangi Oʻzbekiston — global imkoniyatlar chorrahasi» xalqaro forumida turk kompaniyalarining ishtirokini, shuningdek, Hukumatlararo komissiyaning navbatdagi yigʻilishi doirasida Anqarada ishbilarmonlar kengashi va palataning ehtimoliy qoʻshma majlisini oʻtkazish masalasini muhokama qildi.