Aholining inflyatsion kutilmalari 2026-yil sentabrida 8,7 foizgacha pasaydi

Markaziy bank (MB) maʼlumotlariga koʻra, aholining oʻrtacha prognozi kuzatuvlar tarixidagi eng quyi darajaga tushdi. Mediana bahosi oʻzgarmadi va xuddi avgustdagi kabi 8 foizga teng boʻldi. Tadbirkorlarda esa oʻrtacha kutilmalar 9,6 foizdan 9,2 foizgacha pasaygan boʻlsa, mediana 8 foizdan 9 foizgacha koʻtarildi. Soʻrovnomada 2 726 nafar aholi vakili va 1 043 ta tadbirkorlik subyekti ishtirok etdi.

Hududlar orasida eng yuqori prognozni Toshkent shahri aholisi (11,6 foiz), eng pastini Xorazm viloyati (6,8 foiz) berdi. Bandlik guruhlari ichida narxlar oʻsishini eng koʻp pensionerlar (12,4 foiz), eng kam savdo sohasi xodimlari (7,8 foiz) kutmoqda. Daromadi 30 mln soʻmdan ortiq boʻlgan respondentlar 14,4 foizni, daromadi 2 mln soʻmgacha boʻlganlar esa 7,6 foizni koʻrsatgan. Tadbirkorlar orasida transport xizmatlari sohasi yetakchilik qilmoqda (10,7 foiz), eng past kutilmalar esa turizmda (7,5 foiz).

Aholi kelgusidagi narxlar oshishining asosiy sabablari sifatida avvalgidek yoqilgʻi va energiya resurslari (50 foiz) hamda kommunal xizmatlar (avgustdagi 53 foizga nisbatan 38 foiz) qimmatlashishini koʻrsatmoqda. Oziq-ovqat mahsulotlarini belgilaganlar ulushi 21 foizdan 31 foizgacha oʻsdi. Tadbirkorlar xomashyo narxining qimmatlashishi (19 foizga nisbatan 37 foiz) va soliq yukini (15 foizga nisbatan 29 foiz) deyarli ikki baravar koʻproq tilga ola boshlagan.

MB baholashiga koʻra, aholi tomonidan sezilgan sentabr oyidagi inflyatsiya bir oy oldingi 10,1 foizdan 9,2 foizgacha pasaydi. Milliy statistika qoʻmitasi sentabrdagi yillik inflyatsiyani 6,4 foiz deb baholagan.