Energetika vazirligi quyosh panellarini ulash qoidalariga oydinlik kiritdi

Energetika vazirligi tushuntirishiga koʻra, barchasi uskunaning quvvatiga bogʻliq. Agar qurilma 20 kVt dan oshmasa, elektr taʼminoti korxonasidan texnik shartlarni soʻrash hamda elektr taʼminoti loyihasini ishlab chiqish talab etilmaydi: tarmoqqa ulash ulanish sxemasi boʻyicha amalga oshiriladi. Quvvati 20 kVt dan yuqori boʻlgan qurilmalar uchun esa texnik shartlar va loyiha majburiy boʻlib, belgilangan tartibda rasmiylashtiriladi. Idora Vazirlar Mahkamasining 2021-yil 31-avgustdagi 555-son qarori bilan tasdiqlangan Maʼmuriy reglamentning 3, 4 va 19-bandlariga havola qildi.

Upl.uz xabar berishicha, vazirlikda subsidiya haqida ham aytib oʻtildi: davlat turar joylarda quyosh panellarini sotib olish va montaj qilish xarajatlarining 20 foizini oʻz zimmasiga oladi. Buning uchun esma.uzex.uz platformasida roʻyxatdan oʻtish va ariza topshirish zarur. Soʻngra mutaxassislar xonadonni koʻzdan kechiradi va energiya auditi yakunlari boʻyicha xulosa beradi.

Shundan keyin uy egasi xuddi shu platformada yetkazib beruvchini tanlaydi, u bilan elektron shartnoma tuzadi va tizim orqali uning summasining 80 foizini toʻlaydi. Qolgan 20 foizini davlat uskuna montaj qilinib, zarur hujjatlar rasmiylashtirilgach, yetkazib beruvchiga oʻzi oʻtkazib beradi. Mazkur tartib Vazirlar Mahkamasining 2025-yil 24-oktabrdagi 673-son qarori 10-bandining «b» kichik bandi hamda u bilan tasdiqlangan Nizomning 3, 4 va 15-bandlarida belgilab qoʻyilgan.