Buxoro NQIZni 328 mln dollarga modernizatsiya qilish rejalashtirilmoqda

Gazeta.uz maʼlumotlariga koʻra, loyihaning 49 mln dollari zavodning oʻz mablagʻlariga, yana 279 mln dollari esa xorijiy kreditlarga toʻgʻri keladi. Buxoro viloyatining Qorovulbozor tumanidagi korxonada naftani gidrotozalash va izomerizatsiya qilish qurilmalarini oʻrnatish rejalashtirilgan. Matbuot xizmatida tushuntirilishicha, ular «Yevro-5» ekologik standartidagi AI-92 va AI-95 benzini ishlab chiqarishni koʻpaytirish uchun zarur. Loyihaga, shuningdek, xomashyoni fraksiyalarga ajratuvchi va ogʻir qoldiqlarni chuqurroq qayta ishlovchi uskunalarni yangilash ham kiritilgan.

Prezident ishlarning muddatlari va sifatiga rioya qilish, yangi qurilmalarning mavjud liniyalar bilan muvofiqligini hamda yangilanish davrida zavodning barqaror ishlashini taʼminlash boʻyicha topshiriq berdi. Bundan tashqari, davlat rahbari loyihada ishtirok etayotgan xorijiy kompaniyalar vakillari bilan uchrashuv oʻtkazdi; bu qanday kompaniyalar ekani maʼlum qilinmagan. Modernizatsiyani yakunlash muddatlari va pudratchilar nomi keltirilmagan.

3200 dan ortiq kishi mehnat qilayotgan zavod yanvar–sentabr oylarida qiymati 12,1 trln soʻmlik 1,36 mln tonna neft mahsulotlari ishlab chiqardi. Shu davrda korxona 99,5 mln dollarlik mahsulot va xizmatlarni eksport qildi, yil oxirigacha esa 116 mln dollarga yetkazishni moʻljallamoqda.

Loyihaning tayyorlanayotgani haqida 27-oktabr kuni «Oʻzbekneftgaz» matbuot anjumanida ham aytib oʻtilgan edi. Davlat kompaniyasi boshqaruvi raisining birinchi oʻrinbosari Suhrob Hamroyev oʻshanda ishlar 2026-yilning toʻrtinchi choragida yoki 2027-yilda boshlanishi mumkinligini, ijrochilar esa ochiq tenderda tanlab olinishini bildirgan edi. Kompaniyada modernizatsiyadan soʻng yuqori oktanli benzinning tannarxi va uning narxi pasayishini kutishmoqda.