Mirziyoyev Buxoroda kongress-xoll va ikkita mehmonxona qurilishi bilan tanishdi

Gazeta.uzʼning prezident matbuot xizmatiga tayanib yozishicha, maydoni 14,5 ming kvadrat metr boʻlgan kongress-xoll 60 mln dollarga tushadi. Obyektda beton ishlari yakunlangan, quruvchilar tashqi muhandislik tarmoqlarini tortmoqda, fasad va tomni barpo etmoqda.

Shu hududning oʻzida yerosti avtoturargohiga ega, 212 xonali, yetti qavatli Hilton Garden Inn mehmonxonasi qurilmoqda, uning qiymati — 37 mln dollar. Binoning asosiy konstruksiyalari tayyor, hozirda ichki devorlar tiklanmoqda, kommunikatsiyalar oʻtkazilmoqda va fasad pardozlanmoqda. Ikkinchi mehmonxona — Holiday Inn ham 212 xonaga moʻljallangan va yetti qavatdan iborat; uning qiymati 39,6 mln dollarni tashkil etadi. Mehmonxonada tom va ichki devorlar montaj qilinmoqda, uning yonida esa ikki qavatli biznes markazi qad koʻtarmoqda, uning yerosti qismida betonlash ishlari yakunlanmoqda. Obyektlarning umumiy qiymati 136 mln dollardan oshadi.

Gazeta.uz maʼlumotlariga koʻra, prezident Buxoroda yuqori darajadagi xalqaro tadbirlarni oʻtkazish va sayyohlik xizmatlarini kengaytirishda mazkur loyihalarning ahamiyatini taʼkidladi. U qurilishni sifat talablariga rioya qilgan holda, oʻz vaqtida yakunlashni topshirdi.