Nukusda 22 ta gaz toʻldirish shoxobchasi narxlarni kelishib oshirgani uchun jarimaga tortildi

Tekshiruv fuqarolardan birining murojaatidan soʻng oʻtkazildi: qoʻmita mutaxassislari Nukusdagi 22 ta AGTKShdagi narxlarni oʻrgandi. Mazkur shoxobchalarda bir kub metr siqilgan gaz narxi bir vaqtda, amaldagi narxga nisbatan oʻrtacha 1050 soʻmgacha oshgani maʼlum boʻldi.

Qoʻmitaning Qoraqalpogʻistondagi maxsus komissiyasi shoxobchalarga nisbatan «Raqobat toʻgʻrisida»gi qonunning raqobatga qarshi kelishib olingan harakatlarga daxldor boʻlgan 19-moddasi buzilishi alomatlari boʻyicha ish qoʻzgʻatdi. Koʻrib chiqish natijalariga koʻra moliyaviy jarimalar qoʻllashga qaror qilindi, ularning summasi xabarda keltirilmagan. Bundan tashqari, shoxobchalarga qonunbuzarliklarni bartaraf etish va kelgusida bunday holatga yoʻl qoʻymaslik boʻyicha bajarilishi majburiy boʻlgan koʻrsatmalar berildi.

Toʻqqizta xoʻjalik yurituvchi subyekt komissiya qaroriga rozi boʻlmay, sudga shikoyat qildi. Sud qoʻmita qarorlarini qonuniy deb topdi, deb xabar berdi idora.