Oʻzbekistonda paxta yetishtiruvchilar uchun yangi subsidiyalar eʼlon qilindi

Paxtani birja orqali sotgan fermerlarga va uni sotib olgan klasterlarga har bir tonna uchun 500 ming soʻmdan subsidiya toʻlanadi. Oʻz yer uchastkalarida paxta yetishtirayotgan klasterlar esa har bir gektar uchun 1,5 million soʻm miqdorida subsidiya olishlari mumkin boʻladi.

Prezident, shuningdek, masʼul idoralarga tayyor mahsulot eksportchilarining kredit foizlarini uch yil davomida qisman kompensatsiya qilish boʻyicha hisob-kitoblarni taqdim etishni topshirdi. Chet el valyutasidagi qarzlar boʻyicha yillik 5 foizdan, milliy valyutadagi kreditlar boʻyicha esa 14 foizdan yuqori stavkalarni qoplash taklif etildi. Bundan tashqari, hukumat elektron savdo maydonchalari (marketpleyslar) orqali sotilgan toʻqimachilik mahsulotlari qiymatining 3 foizini qaytarish boʻyicha takliflar ishlab chiqadi.

Yigʻilishda, shuningdek, ishchilari soni ming nafardan ortiq boʻlgan korxonalarni qoʻllab-quvvatlash rejalari ham eʼlon qilindi: ularga xodimlarni oʻqitish va ularni tashish xarajatlarining 50 foizigacha boʻlgan qismini qoplash, kamida besh yil ishlaganlarning esa farzandlari oʻqishi uchun kontrakt toʻlovini toʻlab berish koʻzda tutilgan. Andijon viloyatining adir hududlarida sanoat bogʻlarini barpo etish uchun “Agrostar” kompaniyasi tashkil etiladi, bunga 30 million dollar hamda suv taʼminoti uchun 200 milliard soʻm ajratiladi.