Oʻzbekistonda paxta yetishtiruvchilar uchun yangi subsidiyalar eʼlon qilindi

Paxtani birja orqali sotgan fermerlar va uni sotib olgan klasterlarga har bir tonna uchun 500 ming soʻmdan subsidiya toʻlanadi. Oʻz yer uchastkalarida paxta yetishtiradigan klasterlar bir gektar uchun 1,5 million soʻm miqdorida subsidiya olishlari mumkin boʻladi.

Prezident, shuningdek, mutasaddi idoralarga tayyor mahsulot eksportchilarining kreditlari boʻyicha foizlarning bir qismini uch yillik kompensatsiya qilish hisob-kitoblarini kiritishni topshirdi. Xorijiy valyutadagi qarzlar boʻyicha yillik 5 foizdan, milliy valyutadagi kreditlar boʻyicha esa 14 foizdan yuqori stavkalarni qoplash taklif etildi. Bundan tashqari, hukumat elektron savdo maydonchalari (marketpleyslar) orqali sotilgan toʻqimachilik mahsulotlari qiymatining 3 foizini qaytarish boʻyicha takliflar ishlab chiqadi.

Yigʻilishda, shuningdek, xodimlari soni ming kishidan ortiq boʻlgan korxonalarni qoʻllab-quvvatlash rejalari eʼlon qilindi: ularga ishchilarni oʻqitish va ularni tashish xarajatlarining 50 foizigacha qismi qoplanishi, kamida besh yil ishlaganlarning farzandlari taʼlim shartnomasi toʻlab berilishi koʻzda tutilgan. Andijon viloyatining togʻoldi hududlari uchun sanoat bogʻlarini barpo etish maqsadida "Agrostar" kompaniyasi tashkil etiladi, bunga 30 million dollar va suv taʼminoti uchun 200 milliard soʻm ajratiladi.