Toshkentda qozogʻistonlik yosh futbolchilar shifoxonaga yotqizildi

5-sonli shahar yuqumli kasalliklar shifoxonasida 2-noyabr kuni ertalab 28 nafar bemor boʻlgan: 16 nafar bola, 11 nafar ota-ona va bir nafar murabbiy. Soat 15:00 ga kelib ularning bir qismiga javob berildi. Podrobno.uz maʼlumotlariga koʻra, 12 nafar bola va toʻqqiz nafar kattaga tibbiy yordam zarur boʻlgan.

Oʻyinchilardan birining onasi dastlabki bolalarning ahvoli 30-oktabr kuni nonushtadan keyin yomonlashganini, 31-oktabrga oʻtar kechasi esa ularning ayrimlarida tana harorati koʻtarilib, qayt qilish va diareya paydo boʻlganini aytdi. Podrobno.uz keltirgan Qozogʻiston OAVlari talqiniga koʻra, tobi qochish 31-oktabr kuni boshlangan. Keyinroq shunga oʻxshash alomatlar boshqa jamoalar oʻyinchilarida ham paydo boʻlgan va 1-noyabr kuni ayrim futbolchilar final oʻyinlariga chiqa olmagan. Ota-onalar kasallikni ishtirokchilar yashagan mehmonxonadagi nonushta bilan bogʻlamoqda va tuxum yemaganlarning hech biri kasallanmaganini taʼkidlamoqda. Sabab boʻyicha hozircha rasmiy xulosa yoʻq.

Qozogʻiston TIV yordamga muhtoj barcha mamlakat fuqarolari Oʻzbekistonning ixtisoslashtirilgan tibbiyot muassasalarida davolanayotgani, diplomatlar esa shifoxonalar va qarindoshlar bilan aloqada boʻlib turganini maʼlum qildi. Qozogʻiston bola huquqlari boʻyicha vakili Dinara Zakiyeva Oʻzbekiston bolalar ombudsmani bilan muloqot qilayotganini, uning soʻzlariga koʻra, vaziyatni Oʻzbekiston sogʻliqni saqlash vaziri nazorat qilayotganini bildirdi.

Turnir 28-oktabrdan 2-noyabrgacha boʻlib oʻtdi. Qaragʻandi viloyatidan uchta xususiy maktabdan 60 nafar bola, 32 nafar ota-ona va toʻrt nafar murabbiy kelgan. 2-noyabr kuni 15 kishi Ostonaga uchib ketdi, qolganlar 3-noyabr kuni poyezdda yoʻlga chiqishni rejalashtirmoqda.