Fargʻonada uchta bogʻchaning 51 nafar tarbiyalanuvchisi shifoxonaga tushdi

Gap 2-, 7- va 47-sonli maktabgacha taʼlim tashkilotlari tarbiyalanuvchilari haqida bormoqda. Qoʻmita maʼlumotlariga koʻra, bolalarda tana harorati koʻtarilgan, qorin ogʻrigʻi, holsizlik, koʻngil aynishi va diareya paydo boʻlgan. Gazeta.uzʼning aniqlik kiritishicha, ular oʻtgan haftaning oxirida shifoxonaga yetkazilgan.

26-oktabr soat 11:00 holatiga koʻra, statsionarda 28 nafar bola qolayotgan edi. Idora ularning ahvolini barqaror deb baholamoqda, oralarida ogʻir bemorlar yoʻq. Ahvoli qoniqarli deb topilgan yana 23 nafar bolaga uyiga ruxsat berilgan: ular tibbiy tavsiyalarni olgan holda davolanishni oʻsha yerda davom ettirmoqda.

Dastlabki epidemiologik surishtiruv doirasida mutaxassislar bolalar bogʻchalarda nonushta, tushlik va ikkinchi tushlikda nimalar yeganini oʻrganib, ushbu mahsulotlarni kim yetkazib berganini aniqladilar. Oziq-ovqat mahsulotlari va tayyor taomlar namunalari bakteriologik tahlilga yuborildi. Surishtiruv va laboratoriya tekshiruvlari hali yakunlanmagan, deb xabar berdi qoʻmita. Uning xabarini Fargʻona viloyati hokimligi matbuot xizmati ham tarqatdi.