Toshkentdagi Botkin qabristonida devor qulashi oqibatida qabrtoshlar shikastlandi

Poytaxt maʼmuriyati maʼlumotlariga koʻra, qurilish sobiq shampan vinolari zavodi hududida olib borilgan. 15-sektorning oxirgi qatoridagi toshlar shikastlangan. Hokimlikning aniqlik kiritishicha, qabrlarning oʻzi ochilib ketmagan.

Hokimlik bayonotida aytilishicha, vaziyatni shahar maʼmuriyati va Obodonlashtirish bosh boshqarmasi nazoratga olgan. Rasmiylarning soʻzlariga koʻra, qoidabuzarliklar bilan olib borilgan ishlar toʻxtatilgan, masʼullar aniqlangan. Devor qulashi holatlari va masʼullarning xatti-harakatlariga huquqiy baho beriladi, aybdorlar esa belgilangan tartibda javobgarlikka tortilishi vaʼda qilingan. «Biz yaqinlarning dardi va gʻazabini tushunamiz. Marhumlar xotirasiga va ularning yaqinlarining tuygʻulariga hurmat soʻzsiz boʻlishi kerak», — deya taʼkidlandi maʼmuriyatda.

Buyurtmachi va pudratchi tashkilotga devor qulashi oqibatlarini bartaraf etish hamda qabrtoshlarni hafta oxirigacha tiklash topshirildi. Hokimlik maʼlumotiga koʻra, har ikki tashkilot uzr soʻragan va ushbu muddatni tasdiqlagan, rasmiylar esa tiklash jarayoni haqida qoʻshimcha ravishda xabar berib borishga vaʼda qilmoqda.

Bayonotdan oldin ijtimoiy tarmoqlarda singan yodgorliklar, qiyshaygan xochlar va panjaralar aks etgan videolar tarqaldi. Gazeta.uzʼning qayd etishicha, foydalanuvchilarning xabarlariga koʻra, hodisa 18-oktyabrdayoq sodir boʻlgan boʻlishi mumkin, videolarning bir qismi esa 21-oktyabrda suratga olingan.