Xorazm viloyatida ona va uning uch qizi vafot etdi, jinoyat ishi qoʻzgʻatildi

Bosh prokuraturaning dastlabki maʼlumotlariga koʻra, 8-oktyabr kuni oila bir kun avval nishonlangan tugʻilgan kundan qolgan mahsulotlarni isteʼmol qilgan. Shundan soʻng ularning toʻrtalasida ham zaharlanish alomatlari yuzaga kelgan, 9 va 10-oktyabr kunlari ular vafot etgan. Qizlarning kattasi 7 yoshda boʻlgan.

10-oktyabr kuni xavfsizlik talablariga javob bermaydigan tovarlar va xizmatlarga taalluqli boʻlgan Jinoyat kodeksining 276-11-moddasi 4-qismi “a” bandi boʻyicha jinoyat ishi qoʻzgʻatildi. Oʻlim sabablarini aniqlash maqsadida sud-tibbiy ekspertizasi tayinlangan. Tekshiruvga Sanitariya-epidemiologik osoyishtalik va jamoat salomatligi xizmati, shuningdek, viloyat sogʻliqni saqlash hamda favqulodda vaziyatlar boshqarmalari mutaxassislari jalb etilgan.

Podrobno.uz nashrining bunday kvalifikatsiya xavfli mahsulotlar uyda tayyorlanmasdan, sotib olinganini anglatadimi degan savoliga huquq-tartibot organlari ushbu holatga hozirda tergov tomonidan aniqlik kiritilayotganini maʼlum qildi. Mahalla raisi Kun.uz bilan suhbatda oʻlim sababi hozircha aniqlanmagani, salatlarni esa ayolning oʻzi tayyorlaganini aytdi; turmush oʻrtogʻi oʻsha kuni uyda boʻlmagan.