Toshkentda xususiy uyda olti kishi is gazidan halok boʻldi

Bu vaqtda uyda qurilish-taʼmirlash ishlari olib borilayotgan boʻlgan. Idoraning dastlabki maʼlumotlariga koʻra, yertoʻlaga oʻrnatilgan isitish qozoni xavfsizlik talablariga javob bermagan, uy esa gaz tarmogʻiga texnik shartlarsiz ulangan. Mirzo Ulugʻbek tumani prokuraturasi kasb yuzasidan oʻz vazifalarini lozim darajada bajarmaslik, mehnatni muhofaza qilish qoidalarini buzish hamda hokimiyat yoki mansab vakolatini suiisteʼmol qilish (JKning 116, 257 va 205-moddalari) moddalari boʻyicha jinoyat ishi qoʻzgʻatdi. Tergov harakatlarini Toshkent shahar prokuraturasi olib bormoqda.

Gazeta.uzʼning aniqlashicha, soat 10:00 atrofida 112 xizmatiga qoʻngʻiroq qilinib, «Alisherobod» mahallasida qurilishi davom etayotgan ikki qavatli uyda hushini yoʻqotgan odamlar borligi haqida xabar berilgan. Respublika shoshilinch tibbiy yordam ilmiy markazi nashrga 25-oktabr kuni jabrlanganlar reanimatsiyada ekanini tasdiqlagan va ahvoli qoniqarli deb baholangan yana bir kishi haqida aytib bergan. Nashr maʼlumotlariga koʻra, halok boʻlganlar erkaklar boʻlib, ularning barchasi, shuningdek shifoxonaga yotqizilganlar Qoraqalpogʻistonning Ellikqala va Amudaryo tumanlaridan boʻlgan.

Bosh prokuratura fuqarolarni gaz uskunalari va isitish moslamalaridan foydalanishda yongʻin xavfsizligi talablariga rioya qilishga, ularni oʻrnatishni malakali mutaxassislarga topshirishga hamda sozligini muntazam tekshirib turishga chaqirdi. Avvalroq Favqulodda vaziyatlar vazirligi aholiga isitish moslamalarini tekshirishni va moʻrilarini tozalashni tavsiya qilgan edi.