Sirdaryodagi yangi IESdagi avariya ikki mamlakatda elektr uzilishlariga sabab boʻldi

Hodisa soat 5:05 da ishga tushirish-sozlash ishlari davomida sodir boʻlgan. Avtomatik himoya tizimlarining ishga tushishi respublikaning ayrim hududlarida elektr taʼminotida qisqa muddatli uzilishlarga sabab boʻldi. Energetika vazirligi maʼlumotlariga koʻra, cheklovlar asosan maishiy isteʼmolchilar va qishloq xoʻjaligidagi nasos stansiyalariga taʼsir koʻrsatgan. Soat 7:27 ga kelib, elektr stansiyalarining zaxira quvvatlari hamda energiyani saqlash tizimlari jalb etilishi hisobiga energiya yetkazib berish toʻliq tiklandi.

Ushbu nosozlik Qozogʻistonning yagona tarmogʻiga ham taʼsir koʻrsatdi. Qozogʻistonning KEGOC operatori xabar berishicha, Oʻzbekistonda 1516 MVt generatsiyaning oʻchirilishi (Oʻzbekiston Energetika vazirligi bahosiga koʻra — 1600 MVt) quvvatning keskin ortishiga va «Shimol — Janub» tranzitining boʻlinishiga olib keldi. Qozogʻistondagi isteʼmolchilar uchun cheklovlar 962 MVt ga yetdi, biroq soat 5:43 ga kelib energiya tizimlarining parallel ishlashi qayta tiklandi.

Sirdaryo viloyatining Boyovut tumanida joylashgan 1573 MVt quvvatga ega elektr stansiyasi 25-avgustda ishga tushirilgan edi. Qiymati 900 million dollarlik loyiha EDF (Fransiya), Nebras Power (Qatar), Sojitz va Kyuden International (Yaponiya) kompaniyalari konsorsiumi tomonidan amalga oshirilgan.