Fargʻona viloyatida bir haftada 12 kishi is gazidan vafot etdi

Birinchi fojia 25-oktabr kuni roʻy berdi: Fargʻona tumanining Chimyon qishlogʻida bir oilaning yetti nafar aʼzosi halok boʻldi. Ikkinchi holat 1-noyabr kuni Qoʻqon shahrida qayd etildi, u yerda besh kishi qurbon boʻldi. Bosh prokuratura matbuot kotibi Gazeta.uzʼga aniqlik kiritishicha, bu koʻp qavatli uydagi xonadonda sodir boʻlgan, halok boʻlganlarning uch nafari voyaga yetmaganlar boʻlib, ularning barchasi voqea joyida vafot etgan.

FVB asosiy sabablardan biri sifatida gazli isitish moslamalaridan foydalanishda xavfsizlik qoidalarining qoʻpol ravishda buzilganini keltirdi. Idora Germaniyaning «Vaillant» rusumli eski ikki konturli qozonlarining xavfliligidan ogohlantirdi: uning maʼlumotlariga koʻra, ular Germaniyada oʻz resursini oʻtab boʻlgan va utilizatsiyaga topshirilgan. FVB taʼkidlashicha, ayrim tadbirkorlar ularni ehtiyot qismlar niqobi ostida mamlakatga noqonuniy olib kirib, qoʻlbola usulda tiklagan va fuqarolarga yangi sifatida sotgan.

Idora maʼlumotiga koʻra, bunday qozonlar original tutun chiqarish tizimlarisiz keltirilgan, ularning oʻrniga esa qiziganda qattiqligini yoʻqotadigan va mahkamlagichlardan chiqib ketishi mumkin boʻlgan polietilen kanalizatsiya quvurlari oʻrnatilgan. FVB yana bir xavfni havo kirish teshiklarining mato yoki boshqa buyumlar bilan yopib qoʻyilishida koʻrmoqda: bunday holda gaz toʻliq yonmaydi va xonada is gazi toʻplanadi.

FVB aholini mutaxassislar ishtirokida isitish tizimini tekshirishga hamda sifat sertifikatiga ega boʻlmagan yoki oʻzboshimchalik bilan qayta ishlangan moslamalardan foydalanmaslikka chaqirdi. Avvalroq Toshkent shahrining Mirzo Ulugʻbek tumanidagi qurilayotgan xususiy uyda olti kishining jasadi topilgan, yana ikki kishi ogʻir ahvolda shifoxonaga yotqizilgan edi; dastlabki maʼlumotlarga koʻra, bunga notoʻgʻri oʻrnatilgan qozon sabab boʻlgan.