Toshkent shahar IIBB blogerning xonandaga nisbatan qotillik sahnasi aks etgan videosini tekshirmoqda

IIBBning 6-noyabr oqshomida eʼlon qilingan xabarida aytilishicha, videorolik muallifi boʻlgan Instagram foydalanuvchilaridan birini Olmazor tumani IIO FMB aniqlagan. Vaziyat poytaxt boshqarmasi nazoratida boʻlib, tekshiruv yakunlari boʻyicha qonuniy qaror qabul qilinadi. Idora muallifning ismini keltirmagan. Gazeta.uz xabarda u ushlangan yoki yoʻqligi aytilmaganiga eʼtibor qaratdi.

IIBB shuningdek bloger IIO xodimlari unga video uchun qonuniy choralar koʻrilishini tushuntirganini aytgan videoni tarqatdi. «Bu kontentim uchun hammadan uzr soʻrayman. Qilgan ishimdan pushaymonman», — deydi u. Idora fuqarolarni internetda maʼlumot joylashtirishda qonunga rioya qilishga chaqirdi.

Oldinroq zoʻravonlikka qarshi Nemolchi.uz loyihasi rolikka huquqiy baho berishga chaqirgan edi: dastlab — 4-noyabr kuni, soʻng loyiha Bosh prokuratura va IIVga murojaat qildi. Loyiha tavsifiga koʻra, video qahramoni xonandaning klipini tomosha qiladi, soʻngra uning oʻldirilishi va jasadi koʻmilishiga ishora qiluvchi harakatlarni amalga oshiradi hamda jamiyatda koʻpchilik oʻzligini va shaʼnini unutib qoʻyganini aytib, yana qora paketlar keltirishni soʻraydi. Finalda Oʻzbekiston va IIV bayroqlari paydo boʻladi.

Nemolchi.uz maʼlumotlariga koʻra, muallifning Instagramʼda 600 mingga yaqin obunachisi bor, rolik esa bir necha kun ichida milliondan ortiq koʻrildi. Loyiha murojaat qilgan vaqtga kelib u blogerning sahifasidan oʻchirib yuborilgan edi. Nemolchi.uz oʻzgalarning qarashlari yoki ijodiga rozi boʻlmaslik na tahdidni, na zoʻravonlikni oqlay olmasligini bildirdi.