Ekoqoʻmita somon va xazonlarni yoqqanlik uchun 4,4 mln soʻmgacha jarima borligini eslatdi

Qoʻmita tushuntirishicha, qishloq xoʻjaligi yerlarida oʻsimlik qoldiqlarini yoqish qonun bilan taqiqlangan. Qoidabuzarga nisbatan bazaviy hisoblash miqdorining 10 baravarigacha maʼmuriy jarima nazarda tutilgan. Agar yongʻin ekinlarga zarar yetkazsa, aybdorlarga qoʻshimcha ravishda har bir gektarga yetkazilgan zararga qarab iqtisodiy taʼsir choralari qoʻllanadi.

Idora maʼlumotlariga koʻra, somon, shox-shabba va xazonlar yonganda havoga is gazi, azot va oltingugurt oksidlari, azot dioksidi, benz(a)piren, dioksinlar, dibenzofuranlar, fosgen hamda inson va tabiat uchun xavfli boʻlgan boshqa birikmalar ajralib chiqadi. Bundan tashqari, olov tuproqdagi makro- va mikroelementlarni yoʻq qiladi va yer unumdorligini yoʻqotadi.

Qoʻmita gulxan yoqish oʻrniga oʻsimlik qoldiqlarini kompost qilish, koʻchatlar uchun mulcha yoki chorva uchun ozuqa sifatida ishlatishni maslahat beradi.

Qoʻmita huzuridagi Oʻrmon xoʻjaligi ilmiy-tadqiqot instituti laboratoriya mudiri Jamshid Temirov Podrobno.uz bilan suhbatda kompost uchun sogʻlom barglar, oʻtlar va mayda shoxlar mos kelishini maʼlum qildi. Ularni maydalash, begona chiqindilarni olib tashlash va hoʻl koʻkatlar bilan quruq barglar hamda shoxlarni qatlam-qatlam qilib joylashtirish, soʻngra haddan tashqari qurib ketishi yoki ortiqcha namlanishiga yoʻl qoʻymasdan, vaqti-vaqti bilan aralashtirib turish kerak.