Green Youth Cup 2026 finali: 16 ta ekostartap oʻz loyihalarini investorlarga taqdim etdi

Final shu kunlarda Innoweek xalqaro innovatsion gʻoyalar haftaligiga mezbonlik qilayotgan CAEx koʻrgazmalar markazi maydonida boʻlib oʻtdi. Dastur U-Enter innovatsiya markazi hamda Virtual Accelerate bilan birgalikda Intro Group tomonidan oʻtkazilmoqda, unga Shveysariya va Buyuk Britaniya hukumatlari koʻmak bermoqda.

Arizalarni qabul qilish 7-oktabrda boshlandi, tashkilotchilar 118 ta taklif oldi. Birinchi saralashdan 55 ta jamoa oʻtdi: oktabr oyi davomida ular U-Enter bazasida shugʻullandi, u yerda xalqaro trenerlar ishtirokida oʻnta oʻquv mashgʻuloti tashkil etildi hamda amaliy yoʻnalishdagi ikkita biznes-turga borildi. Eng yaxshi uchta loyiha mualliflariga Web Summit Qatar forumiga borish imkoniyati berildi: forum 2027-yil 31-yanvar – 3-fevral kunlariga rejalashtirilgan, oʻtkazilish joyi — Doha.

Yetakchilar qatorida CoffeeCycle loyihasi qayd etildi: jamoa boshqa organik komponentlar qoʻshilgan holda ishlatilgan qahva quyqasidan organik oʻgʻitlar ishlab chiqaradi. Yana ikki finalchi havoni tozalash ustida ishlamoqda. Toshkent irrigatsiya va qishloq xoʻjaligini mexanizatsiyalash muhandislari instituti talabalarining Bekzod Ergashev rahbarligidagi Plazion jamoasi sanoat obyektlari va issiqxonalar uchun intellektual plazmali qurilma ishlab chiqdi. Rayhona Abdiyeva boshchiligidagi AirO² Air Purifier jamoasi binolar uchun elektrostatik tozalagich modelini namoyish etdi.

Boshqa ishtirokchilar orasida — Eco Leaf: loyiha muallifi Oyatulloh Abdujabborovning soʻzlariga koʻra, oʻrik, olcha va gilos barglaridan jamoa chorva mollari uchun ozuqa briketlari, boshqa daraxtlarning barglaridan esa koʻmir oʻrnini bosuvchi yoqilgʻi briketlari, shuningdek, devorlar va mebellarni issiqlash uchun plitalar oladi. Maktab oʻquvchisi iqlim va hamjamiyatlarni boshqarish haqidagi Ecogenesis oʻquv oʻyinini, 17 yoshli ishtirokchi esa ekoaktivistlarga noqonuniy chiqindixonalarning fotosurati va geolokatsiyasini yuborish mumkin boʻlgan EcoDataHub platformasini taqdim etdi.