GMIIda Toshkentdagi oktabr smogining asosiy sababi ob-havo ekani maʼlum qilindi

Institut maʼlumotlariga koʻra, 19–25-oktabr kunlari mintaqa ustida bosimi 1045 gPa gacha boʻlgan sovuq antisiklon saqlanib turgan, Oʻzbekistonda yogʻingarchilik deyarli boʻlmagan. 25-oktabrga oʻtar kechasi Toshkentda shamol 0,6–1,2 m/s tezlikda esgan, teleminorada esa tun boʻyi kuchli harorat inversiyasi qayd etilgan: farq kechqurun 4,2 darajaga, ertalab esa 2,9 darajaga yetgan. 21–26-oktabr kunlari poytaxtda oʻrtacha sutkalik AQI 93 dan 164 gacha, yaʼni 76 foizga oshgan.

12–16-oktabr kunlari olingan PM2,5 ning 12 ta namunasining laboratoriya tahlili shuni koʻrsatdiki, zarrachalarning oʻrtacha 39,7 foizini tabiiy chang, 42,6 foizini esa sanoat, transport va energetikada yoqilgʻi yoqilishi tashkil etgan. GMIIda namunalar 24–27-oktabrdagi eng yuqori koʻrsatkichdan oldin olingani, shuning uchun bu ulushlar toʻgʻridan toʻgʻri ushbu kunlarga tatbiq etilmasligi taʼkidlanmoqda.

IQAir maʼlumotlariga koʻra, 26-oktabr kuni AQI Bishkekda 160 ga, Toshkentda 157 ga va Chimkentda 149 ga yetgan; institut platforma, jumladan, arzon datchiklardan ham foydalanishidan ogohlantiradi. Shu bilan birga, yanvardan 19-oktabrgacha Toshkentda PM2,5 konsentratsiyasi 2025-yilning shu davriga nisbatan 28 foizga, PM10 esa 32 foizga kamaygan. «Alohida koʻrsatkichlarning pasayishi havoning ifloslanishi muammosi hal boʻlganini anglatmaydi», — dedi Abdulahatov.

Havo monitoringi boʻyicha maxsus komissiya 30-oktabrga oʻtar kechasi vaziyat yomonlashishini prognoz qilmoqda: soat 21:00 dan keyin PM zarrachalari konsentratsiyasi oshishi, kechasi va ertalab esa AQI boʻyicha «Salomatlik uchun zararli» darajasi kutilmoqda, bu milliy indeks boʻyicha «toʻq sariq» rangga toʻgʻri keladi.