IHTTda Oʻzbekistonning 2050-yilgacha dekarbonizatsiya ssenariylari taqdim etildi

IHTT guruhining Abdurashid Bozorov rahbarligidagi tadqiqoti Fransiya taraqqiyot agentligi (AFD) koʻmagida amalga oshirildi, Barqaror rivojlanish va xalqaro munosabatlar instituti (IDDRI) hamda Deep Decarbonization Pathways (DDP) tarmogʻi esa metodologik yordam koʻrsatdi. Hisob-kitoblar Pathways Designer modeliga asoslangan: u energetika, sanoat, transport, qurilish va boshqa sohalardagi ssenariylar 2050-yilgacha va undan keyingi davrda tashlamalarga qanday taʼsir qilishini baholaydi. Model 2025-yilda SIPA loyihasi doirasida IHTT koʻmagida ishlab chiqila boshlagan, 2026-yilda esa baholashga ilk bor qishloq, oʻrmon xoʻjaligi va yer fondining boshqa turlaridan foydalanish (AFOLU) sektori kiritildi. Ish milliy statistika va mamlakatning strategik hujjatlariga tayanadi.

Yangilangan milliy darajada belgilanadigan hissa (MBH 3.0)ga koʻra, 2035-yilga borib Oʻzbekiston YaIM birligiga toʻgʻri keladigan issiqxona gazlari tashlamalarini 2010-yil darajasiga nisbatan 50 foizga kamaytirmoqchi. Hujjatga koʻra, tashlamalarni kamaytirish boʻyicha chora-tadbirlar uchun 2030-yilgacha 33,7 milliard dollar, 2035-yilgacha esa qariyb 70 milliard dollar talab etiladi. 2030-yilgacha boʻlgan mablagʻ taqchilligi 9,5 milliard dollarni tashkil qiladi.

Iqlim iqtisodiyoti instituti (I4CE) ekspertlari LTS Dashboard — kam uglerodli strategiyalarning investitsiya ehtiyojlarini hisoblash vositasini namoyish etdilar va ishtirokchilar uni Oʻzbekiston sharoitiga moslashtirish imkoniyatini muhokama qildilar. Shuningdek, davlat va xususiy moliyalashtirish, yashil obligatsiyalar, davlat-xususiy sheriklik hamda xalqaro iqlim fondlari haqida soʻz bordi. Seminarda Iqtisodiyot va moliya vazirligi vakillari ishtirok etdi.