Ekologiya milliy qoʻmitasi butilka va bankalar uchun majburiy garov joriy etishni taklif qildi

Qutbiddinov ushbu tashabbusni deputatlarga "Chiqindilar toʻgʻrisida"gi qonunning yangi tahririni taqdim etish chogʻida maʼlum qildi. Uning soʻzlariga koʻra, amaldagi tartib aholi va biznesga qadoqlarni saralash uchun yetarli iqtisodiy motivatsiya bermayapti. "Ixtiyoriy tartib amaliyotda joriy etilmagan, bunday chiqindilarni qayta ishlash darajasi esa pastligicha — bor-yoʻgʻi 6,2 foizni tashkil etmoqda", — dedi u. Depozit tizimining mohiyati shundaki, garov summasi ichimlik narxiga kiritiladi va xaridor boʻsh idishni qabul qilish punktiga topshirganida unga qaytarib beriladi. Qoʻmita rahbari oʻrinbosarining taʼkidlashicha, ishlab chiqaruvchilar va savdo sohasiga infratuzilmani yaratish uchun bosqichma-bosqich oʻtish davri berilishi kerak.

Yigʻilishda garov miqdori, tizim operatori, idishlarni qabul qilish joylari va muddatlar aytilmadi. Shuningdek, depozit tizimi qonun loyihasida aynan qanday aks ettirilganiga ham aniqlik kiritilmadi. Palata hujjatni 20-oktabr kuni birinchi oʻqishda maʼqulladi, oldinda keyingi qonunchilik tartib-taomillari turibdi. Toʻqqizta bob va 60 ta moddadan iborat yangi tahrir ayrim tovarlar va qadoqlardan hosil boʻladigan chiqindilar uchun ishlab chiqaruvchilar hamda importchilarning javobgarligini kengaytiradi, belgilangan holatlarda esa utilizatsiya yigʻimini nazarda tutadi.

Qutbiddinovning maʼlumotlariga koʻra, 2025-yilda mamlakatda 15,1 million tonna maishiy chiqindi hosil boʻlgan, shundan 5,2 foizi saralashdan oʻtgan. 23-sentabrdan buyon Chiqindilarni boshqarish va sirkulyar iqtisodiyotni rivojlantirish agentligi Norvegiyaning TOMRA kompaniyasi bilan birgalikda Toshkent shahri va Surxondaryo viloyatida fandonmatlarni sinovdan oʻtkazmoqda. Har bir butilka yoki banka uchun avtomat Click orqali 150 soʻm hisoblaydi, ularni xayriya ishlariga ham yoʻnaltirish mumkin; bunda xarid paytida hech qanday garov undirilmaydi.