Toqayev yirik boylik egalari uchun oshirilgan soliqni muhokama qilishni taklif qildi

Toqayev hukumat va parlamentga mazkur masalani oʻrganib chiqishni topshirdi. «Taʼkidlab oʻtaman, hech kim qonuniy yoʻl bilan olingan aktivlarni qandaydir tarzda cheklamoqchi emas», — dedi prezident va bunday cheklov Konstitutsiyaga zid boʻlishini qoʻshimcha qildi. Uning soʻzlariga koʻra, gap adolat hamda fuqarolarning mamlakat rivojiga mutanosib, halol hissa qoʻshishi haqida bormoqda.

Prezident taklifi boʻyicha topshiriq 29-oktabr kuni hukumat majlisida muhokama qilindi. Bosh vazir Oljas Bektenov Milliy iqtisodiyot hamda Moliya vazirliklariga bir oy ichida oʻta badavlat fuqarolarni soliqqa tortish boʻyicha xalqaro amaliyotni oʻrganib chiqish va oʻz variantlarini taqdim etishni topshirdi. Aynan qanday mexanizmlar taklif qilinishi mumkinligiga hozircha aniqlik kiritilmagan.

2026-yil 1-yanvardan Qozogʻistonda jismoniy shaxslarning daromad soligʻi boʻyicha progressiv shkala qoʻllanila boshlaydi: bazaviy stavka 10% ni tashkil etadi, yillik daromadning 8 500 oylik hisob-kitob koʻrsatkichidan oshgan qismidan esa 15% undiriladi. Gazeta.uzʼning Tengrinews.kzʼga tayanib aniqlik kiritishicha, mazkur chegara yiliga 36 mln tenge (taxminan 79 ming dollar)ni tashkil etadi.

Murojaatnomada Toqayev, shuningdek, soliqqa tortishni toʻliq, shu jumladan sunʼiy intellektni qoʻllagan holda raqamlashtirishga chaqirdi va yangi Soliq kodeksiga oʻzgartirishlar kiritishni topshirdi. Majlis yakunlariga koʻra, Moliya vazirligi soliq va bojxona maʼmuriyatchiligini raqamlashtirishni yakunlashi kerak.