Tailand Turizm vazirligi Oʻzbekiston uchun 15 kunlik vizasiz rejim tarafdori boʻlib chiqdi

Turizm va sport vaziri Surasak Phancharoenworakulning soʻzlariga koʻra, 15 kunlik vizasiz kirish masalasini 9-noyabr kuni Viza siyosati qoʻmitasi yigʻilishiga olib chiqish rejalashtirilmoqda. Qoʻmita bunday chora mamlakat iqtisodiyoti va xavfsizligiga qanday taʼsir qilishini baholashi kerak. Vazir idora xavfsizlik xavfi past boʻlgan davlatlar uchun «maksimal» istisnolarga erishishga harakat qilishini bildirdi. Vazirlikda vizalar berilishidagi surunkali kechikishlar va oʻzbekistonliklar uchun jarayonning murakkabligi tan olindi; gazetaning maʼlumotlariga koʻra, shu sababli mahalliy sayyohlik agentliklari Tailandga turlardan boshqa yoʻnalishlar, xususan Vyetnam foydasiga voz kecha boshlagan.

Oʻzbekiston TIV matbuot kotibi Omonulla Fayziyev avvalroq idora Tailand tomoni bilan kirish tartibini oʻzgartirish masalasini muhokama qilayotganini maʼlum qilgan edi. TIV vakili «Gazeta.uz»ga aytib berishicha, Oʻzbekistonning Bangkokdagi bosh konsulxonasi soʻnggi oylarda viza rejimini yumshatishga erishishga harakat qilib kelgan, 28-oktabrga esa Tailand TIV bilan muzokaralar belgilangan.

15-sentabrdan Tailand 93 ta davlat, jumladan Oʻzbekiston fuqarolari uchun 60 kunlik vizasiz kirish tartibini bekor qildi. Viza olish uchun ariza Thai e-Visa tizimi orqali topshiriladi, biroq uni Tailandning Moskvadagi elchixonasi koʻrib chiqadi, toʻlovni esa, Uzbekistan Airways ogohlantirganidek, faqat elchixona orqali naqd pulda toʻlash mumkin. Aviasales Uzbekistan maʼlumotlariga koʻra, sentabr oyida Tailandga aviachiptalarni qidirish chastotasi 81 foizga, bron qilishlar soni esa 84 foizga kamaydi.