Vuchich oʻz partiyasining Serbiya parlamenti saylovlaridagi magʻlubiyatini tan oldi

Podrobno.uz keltirgan Respublika saylov komissiyasi maʼlumotlariga koʻra, "Talabalar roʻyxati" 50,84 foiz, Vuchichning roʻyxati esa 40,41 foiz ovoz toʻplagan. "Bu saylovda yutqazganimiz aniq", — dedi siyosatchi. Uning baholashicha, harakat 250 ta mandatdan 135 tadan 140 tagachasini, Serbiya ilgʻor partiyasi esa taxminan 105 tasini oladi. Vuchichning soʻzlariga koʻra, muxolifat uchun 2,2 milliondan ortiq, uning partiyasi uchun esa 1,7 million kishi ovoz bergan. Saylov komissiyasining dastlabki maʼlumotlariga koʻra, davomat 70 foizga yaqinlashgan — bu Yugoslaviya parchalanganidan keyingi eng yuqori koʻrsatkich (uchastkalar yopilishidan ikki soat oldin u 64,9 foizni tashkil etgan edi). Vuchichning bayonotidan soʻng Belgrad va boshqa shaharlar koʻchalariga natijani nishonlayotgan odamlar chiqdi.

Podrobno.uz nashrining Serbiyaning Nova nashriga tayanib xabar berishicha, Vuchich magʻlubiyatda Amerika "chuqur davlati"ni va uning soʻzlariga koʻra, bunga yordam bergan bir necha Yevropa mamlakatlaridagi kuchlarni aybladi. Shuningdek, u Serbiya Rossiyaga qarshi sanksiyalar kiritishi mumkinligini istisno etmadi, uning fikricha — kelasi yilning bahoridayoq.

"Talabalar roʻyxati" 2024-yil 1-noyabrda Novi-Saddagi vokzalda bostirma qulab tushib, 16 kishi halok boʻlganidan keyin boshlangan norozilik namoyishlari ortidan vujudga kelgan. Aksiya ishtirokchilari hukumatni korrupsiya va beparvolikda ayblagan edi. 9-sentabr kuni Vuchich parlamentni tarqatib yubordi, 27-sentabrda esa uchinchi muddatga saylana olmasligi sababli prezidentlik lavozimidan ketdi va bosh vazir boʻlish umidida oʻz partiyasining kampaniyasiga boshchilik qildi. Parlament spikeri Ana Brnabich prezident vazifasini bajaruvchi boʻldi.