Saida Mirziyoyeva Ashxobodda Otoboyeva va Laylo Aliyeva bilan uchrashuv oʻtkazdi

Otoboyeva Vasiylikka muhtoj bolalarga yordam koʻrsatish xayriya jamgʻarmasining davolash faoliyati boʻyicha vitse-prezidenti, Aliyeva esa Haydar Aliyev jamgʻarmasi vitse-prezidenti lavozimini egallab kelmoqda. Mirziyoyevaning soʻzlariga koʻra, bunday uchrashuvlar «allaqachon ezgu anʼanaga aylangan» boʻlib, har gal tomonlarda birgalikda ishlash uchun koʻproq umumiy gʻoyalar va imkoniyatlar paydo boʻlmoqda.

Administratsiya rahbari, shuningdek, Oʻzbekiston va Turkmanistonning madaniy-gumanitar sohadagi munosabatlari yangi bosqichga koʻtarilganini taʼkidlab, buni oliy darajada erishilgan kelishuvlarning ijrosi bilan bogʻladi. Otoboyeva, oʻz navbatida, ikki davlat oʻrtasidagi gumanitar hamkorlikning bevosita, shuningdek, mintaqalararo va xalqaro tuzilmalar orqali rivojlanishi muhimligini qayd etdi. Mirziyoyeva Oʻzbekiston, Turkmaniston va Ozarbayjonni uzoq yillik doʻstlik, ishonch hamda umumiy qadriyatlar birlashtirib turishini aytib, keyingi uchrashuvlar ham insonlar manfaati yoʻlidagi ezgu ishlar bilan davom etishiga umid bildirdi.

Uchrashuv arafasida Mirziyoyeva Turkmaniston Davlat badiiy akademiyasida «Ona tabiat» xalqaro sanʼat koʻrgazmasining ochilish marosimida ishtirok etdi. Uning taʼkidlashicha, asarlar mualliflari sanʼat vositasida tabiat ham, onalar kabi, mehr, gʻamxoʻrlik va ehtiromga loyiq ekanini koʻrsatib bergan, bunday munosabatni esa bolalarga singdirish muhimdir. U Gurbanguli Berdimuhamedov nomidagi xayriya jamgʻarmasi va Haydar Aliyev jamgʻarmasini koʻrgazma ochilishi bilan tabriklab, tashkilotchilarga minnatdorlik bildirdi.