Kongo DR Sogʻliqni saqlash vazirligi: Eboladan vafot etganlar soni 4561 nafarga yetdi

Idora maʼlumotlariga koʻra, oʻlim darajasi 48,2% ni tashkil etmoqda. Eng ogʻir vaziyat Ituri provinsiyasida kuzatilmoqda: barcha qayd etilgan kasallanishlarning 73,2 foizi va yangi holatlarning 67,5 foizi shu yerda aniqlangan. Virus sakkizta provinsiyadagi 178 ta tibbiy zonaning 66 tasida aniqlangan, kasallanganlar orasida 269 nafar tibbiyot xodimi bor. Vazirlik keltirgan raqamlarni TASS xabar qilmoqda.

Epidemiya 15-may kuni bir vaqtning oʻzida KDR va Ugandada boshlangan edi. Uganda 28-iyul kuni oʻz hududida epidemiya tugaganini eʼlon qildi, JSST buni 25-avgustda tasdiqladi. Keniyada birinchi holat 6-oktabrda tasdiqlandi: muqaddam KDRda yashagan ushbu mamlakat fuqarosi kasallangan. U Nayrobiga Uganda orqali 3-oktabrda kelgan va 5-oktabrda vafot etgan. 19-oktabrga kelib Keniyada sakkizta holat qayd etilgan (JSST maʼlumotlariga koʻra, Naked Science keltirishicha — yettita).

Naked Science nashrining yozishicha, epidemiyaga virusning kam uchraydigan «bandibugio» shtammi sabab boʻlgan boʻlib, unga qarshi hozircha rasman tasdiqlangan vaksinalar va maxsus dorilar mavjud emas. Nashr maʼlumotlariga koʻra, qoʻshni Shimoliy Kivu provinsiyasi rasmiylari Ituridan keluvchilar uchun kirishni bir haftaga yopib qoʻydi, avtomobillar va mototaksilardagi yoʻlovchilar sonini chekladi, shuningdek tungi klublar faoliyatini, sport musobaqalari va siyosiy mitinglarni vaqtincha toʻxtatdi.